UKhabazela ukhaba izinsolo zokusaphaza imali yeJoyous
Music maestro and Joyous Celebration co-founder Lindelani Mkhize Lindelani Mkhize
Image: Sigciniwe
OMUNYE wabasunguli beqembu lomculo wokholo elingaconsi phansi kubalandeli bomculo ezweni iJoyous Celebration, uDkt Lindelani Mkhize, usehlabe wahlikiza izinsolo zokuthi ubenesandla ekungaphathini ngendlela efanele nokusaphaza imali eyenziwa yileli qembu.
UMkhize usho njalo ngesitatimende asikhiphele abezindaba ngoLwesibili, eziphendulela emva kokusabalala kwezinsolo zokuthi ube nesandla ekumosheni imali yaleli qembu, okuvela ukuthi zenziwe ngayebambisene nabo kusungulwa iJoyous Celebration, oMfu Jabu Hlongwane noMfu Mthunzi Namba.
Kulezo zinsolo, kubandakanya ukuthi uMkhize wahluleka ukuveza ukuthi imali yaleli qembu yanyamalala yashona kuphi nokuthi yasebenziseka kanjani, okwaze kwaholela ekutheni inhlangano iJoyous Celebration Foundation igcine ikweleta imali ewu-R1 million kwa-SARS.
Kuvele nokuthi ubethola usizo lokuxhaswa ngasese ngabeMTN, i-African Bank neBathu Sneakers esebenzisa igama leqembu - kubalwa nokuhlela imicimbi okukhona kuwona i-Restoration Show ngo-2022, i-Replenihement Concert ne-Delicious Festival ngo-2023, ne-Soulful Explosion nyakenye.
Usolwa nangokuthi wasebenzisa imali yenkampani engaphezu kwa-R1 million ukuhambela ezindaweni ezahlukene nokupepenyeka ngezimoto eziqashisayo iminyaka emithathu kuhlanganisa ukuboleka u-R300 000 wesamba oqondene nezidingo zeJoyous Celebration.
Eziphendulela ngesitatimende uMkhize uthe: “Zonke lezi zinsolo ezibhekiswe kimina azilona iqiniso nosekuyisikhathi eside zaqala ukubhekiswa kimina. Angikaze ngisebenzise imali yenkampani futhi angikaze ngilawule ukuthi imali isebenze kanjani. Konke okuthinta imali yeqembu bekubhekene noMfu Jabu Hlongwane njengokuyalela kwabebhange ekuqaleni futhi nemininingwane yokusebenza kwemali yeqembu ifakazela loko.”
Eqhuba, uthe lezi zinkinga ziqale ukuqonga ngoDisemba wango-2021, ngenkati uMfu Hlongwane noMfu Namba beveza ukuthi sebehlela ukushiya iqembu, nangempela kwaba njalo sebefaka incwadi yokwesula ngo-2022.
Uthe lolu daba lusezithebeni zomthetho manje, nokuthi yena usazibophezele ukumela iqiniso nokuvikela isithunzi nomlando weJoyous Celebration, eselisize inqwaba yamaciko ukuziphendlela indlela yekusasa eliqhakazile kwezobuciko.