Bethule umcimbi womculo ukuqhakambisa imvelo namagugu eKZN
IMEYA kaMasipala waseMngeni, uMnuz Chris Pappas, ikhuluma esithangamini sokwethula umcimbi i-Sympony By The Water, e-La Clef Boutique Hotel eMidlands, eMgungundlovu, ngoLwesibili
Image: KZN TIFA
KUZOSETSHENZISWA amandla omculo wamakhwaya nawokucula ngokunandisa bukhoma ukuthi kuqhakanjiswe ubuhle bemvelo, isintu, amasiko namagugu aKwaZulu-Natal, kanjalo nawezwe lonkana ukuze kugqame ubuhle nobumqoka bakho empilweni yansuku zonke.
Lokho kuzokwenzeka emcimbini wedili lomculo i-Sympony By The Water, ozobe uqala ukuthi wenzeke nonyaka, ozoba seMidmar Dam, eHowick, ngoMgqibelo wangoMashi 7, kusukela ekuseni kuze kuyoshona ilanga.
Izindaba zalo mcimbi zimenyezelwe ngokusemthethweni esithangamini ebesise-La Clef Boutique Hotel eMidlands, eMgungundlovu, ngoLwesibili, lapho kwethulwe cishe zonke izinhlelo zokuzolindeleka kuwona.
ILUNGU leBhodi yeKwaZulu-Natal Tourism and Film Authority, uDkt Bandile Mkhize, likhuluma esithangamini sokwethula umcimbi i-Sympony By The Water, ebesise-La Clef Boutique Hotel eMidlands eMgungundlovu, ngoLwesibili
Image: KZN TIFA
Umnikazi nomhleli walo mcimbi, uMnuz Njabulo Shangase wenkampani iNJW Projects & Logistics, uthe ngale kokujabulisa abantu ngobuciko bomculo - lo mcimbi uwumbono wakhe wokufisa ukuhlanganisa abantu ngenhloso yokuthuthukisa umphakathi futhi kube kugqama nobuhle bamagugu, amasiko esintu nezindawo eziqhakambisa lokho.
“Sihlose nokuthi sithuthukise intsha eyakhele uMgungundlovu neKwaZulu-Natal yonkana ngokuthi ithole amathuba omsebenzi azoba khona ngaloli hlelo, njengoba kuzothi ngosuku lomcimbi kuhlomule abapheki ababalelwa ku-250 abangabantu abasha nabasathuthuka.
“Ngaphezu kwalokho, bangaphezu kwa-300 abantu abasha esiqale ukusebenzisana nabo kusuka ngonyaka odlule ngenkathi ngiqala umbono walo mcimbi, ebesiwuqhakambisa futhi siwuveza ebantwini ngezinhlelo zokucobelana ngolwazi nangokuthi kubukwe esibhekene nakho emphakathini wethu nsuku zonke,” kulanda uShangase.
Uthe kukhona konke abakwenzayo baqinisekise ukuthi kuhlomula nabantu abakhubazekile ngoba bayazi futhi bayabona ukuthi bavame ukuvaleleka ezintweni eziningi ezinhle ekubeni bebe benamakhono amangalisayo futhi ehlukene abangaba wusizo ngawo ezintweni ezinje.
Udalule ukuthi balindele ukuthi kubuthane izithameli ezingaphezu kwa-3 500 ngosuku lomcimbi kanti kuzobe kunandisa amaciko ehlukene ahlonishwayo okubalwa kuwo uSphokazi, Mthobisi Mthalane, Ernie Smith, Zulu Kingdom Choir, KZN Philhamonic Orhcestra nabanye abaningi.
IMeya kaMasipala waseMngeni, uMnuz Chris Pappas, ithe kuyabajabulisa ukubona kwanda imicimbi eyenziwa ezindaweni ezakhele umasipala ewuholayo ngenxa yeqhaza elihle emnothweni.
“Kanti cishe kungokokuqala ukuthi kube nomcimbi oqhakambisa isintu namagugu ethu uqobo njengalona ngakho sibheke ukuthi usisize kakhulu ukugqamisa ubuhle bezindawo zethu futhi kufukuleke nomnotho wesifundazwe sethu, kubhekwe phambili,” kusho uPappas.
Ilungu leBhodi yeKwaZulu-Natal Tourism and Film Authority, uDkt Bandile Mkhize, nalo liwushayele ihlombe kakhulu lo mcimbi, eliwuchaze ngokuthi ungenye yemibono edingekayo kakhulu ukuqhakambisa nokuveza ubuhle bemvelo.
“Kuwumsebenzi wawo wonke umuntu ukunakekela imvelo yethu nokuthi uma kunemicimbi enjena sonke sisukumele phezulu ukubuthanela kulezo zindawo ezizokwenza ukuthi kwazeke futhi kubonakale ubunjalo bemvelo yethu nobuhle bayo,” kusho uDkt Mkhize.
Amathikithi alo mcimbi aseyatholakala eWebtickets nasePick n’Pay ngo-R150 kuya ku-R350 kanti kubaxhasi bawo kubalwa uMnyango wezemiDlalo, ezobuCiko namaSiko KwaZulu-Natal, uMnyango wezokuVakasha, isiShayamthetho saKwaZulu-Natal, umsakazo i-SAFM noMnyango wabesiFazane, ezaBantu abaSha nabaKhubazekile.
UMNUZ Njabulo Shangase ekhuluma esithangamini sokwethula umcimbi wakhe, i-Sympony By The Water, ebesise-La Clef Boutique Hotel eMidlands, eMgungundlovu, ngoLwesibili
Image: KZN TIFA