Kuqinisekiswe ezinye izilomo kwiCTIJF

BALOKHU beqhubeka nokutomula emgodleni wabo abahleli beCape Town International Jazz Festival ngokumemezla abaculi abazoshiyelana inkundla emcimbini wabo ongoMashi.

Le ndumezulu yaminyaka yonke, okuzoba ngokuka-23 iba khona, izoqala ngoMashi 27 ize isongwe ngakusasa ngomhla ka 28 eCape Town International Convention Centre.

Kuleli sonto kumenyezelwe iqembu laseSoweto iBantu Continua Uhuru Consciousness  (BCUC).

Limenyezelwa nje, bekungakapheli zinsuku ezingakanani kuqinisekiswe inkakha ye-jazz uCarlo Mombelli. Uzobe ehambisana noMarco Wyatt, Msaki, Kyle Shepherd noJonno Sweetman.

UCarlo ulungiselela ukukhipha i-albhamu entsha iThe World is Dancing On The Edge of a A Cliff.

Abanye abaqinisekisiwe ngoLordkez oshisa izikhotha ngengoma ethi Aweh ayenze kabusha esepike kuyo uCassper Nyovest, Sibusiso Mashiloane neScorpion Kings ebunjwe uDJ Maphorisa noKabza De Small.

Bajoyina abamenyezelwa ekuqaleni okungogabe ngezindondo eziyisikhombisa zamaGrammy, uJacob Collier, wase-United Kingdom, ingwazi uSipho “Hotstix” Mabuse, Nduduzo Makhathini, Manana, Jasmine Myra, Rorisang Sechele, Jabulile Majola, Jazzwrld noThukuthela..

Amathikithi ale ndumezulu aseqalile ukudayisa ku: www.ticketmaster.co.za. Awempelasonto aqala ku-R2 100 kuthi awosuku olulodwa abe wu-R1 350.