Kukhonye Isaka emisakazweni yakuleli

BANGENE emabhukwini omlando oCiza, Jazzworx noThukuthela njengoba ingoma yabo Isaka (6am) kube yiyona edlalwe kakhulu emisakazweni kuleli ngo-2025, ngokweRadio Monitor South Africa.

I-Radio Monitor icwaninga ngokudlala komculo emisakazweni nakumathelevishini. ENingizimu Afrika ibheka ukudlalwa komculo eziteshini ezilinganiselwa ku-190.

Ngokocwaningo lwayo Isaka (6am), ephume ngo-Ephreli, idlalwe amahlandla angu-8 005 yalalelwa ngabantu abangu-549.9 million.

Ukuthandwa kwayo kuyenze yaqokwa njengehlukanise unyaka kwiMetro FM.

Ngo-Agasti yenziwe kabusha sekupikwe abaculi baseNigeria uTems no-Omah Lay.

Ukudla umhlanganiso kwabo ekudlalweni kakhulu balandela ezinyathelweni zabanye abaculi abadumile izingoma zabo ezasonga unyaka zisesicongweni. Nyakenye kwakuyingoma ethi Imithandazo kaKabza De Small noMthunzi.

Ngo-2023 kwaba u-AKA epike uKiddominant bethi Company.

Ezinye kubalwa kuzo iJerusalema kaMaster KG apike kuyo uNomcebo ngo-2020, Fetch Your Life kaPrince Kaybee ngo-2019, Collide kaLady Zamar ngo-2018 neTigi kaSands ngo-2017.

UCiza ulungiselela ukuyonandisa kwi-Afrima Music Village eLagos, eNigeria, ngoLwesihlanu.

Umcimbi wandulela imiklomelo ama-All Africa Music Awards azoba seLagos ngeSonto.

Baningi abaculi bakuleli abaqokiwe okubalwa kubo uMawhoo, Nasty C, Kabza De Small, Tyler ICU, Nontokozo Mkhize, Makhadzi, Nkosazana Daughter, Zee Nxumalo, Babalwa M nabanye.