UDladla Mshunqisi uzihola phambili kwabazoxhaswa uMasipala weTheku

UMCULI we-gqom', uDladla Mshunqisi, ophinde abe wumhleli womcimbi ozoxhaswa wuMasipala weTheku, ngemali enkulu kuneminye efake izicelo, uthi yize befuna ukugcina bezimele kodwa uxhaso lukahulumeni basaludinga.

UDladla Mshunqisi uhlela umcimbi waminyaka yonke Usuku Lomshunqo ozoba KwaMashu, ngoNovemba 29.

Ngokwezinqumo zoMkhandlu weTheku, umcimbi uzoxhaswa ngo-R1.5 million.

Eminye ezoxhaswa kubalwa iCoastal Lounge Rural Tourism Extravaganza ezoba ngoSepthemba, 28 no-29. Izothola u-R500 000.

ISisters with Soul okuzonandisa kuyo abesifazane bodwa eMunies Hockey Club ngo-Okthoba 4, yona izothola u-R700 000.

IGagasi FM Beach Fest izothola u-R500 000, uMlazi Jazz Festival utole u-R200 000, iDurban Underground izothola u-R1 million, Durban Jazz Festival u-R1 million kuthi iFact Durban Rocks ithole u-R850 000. Isiyonke imali umasipala ozoxhasa ngayo ingu-R10 million.

Umasipala uthe uthole izicelo zoxhaso ophikweni lwezokuvakasha ezingu-162 zemali engaphezulu kancane kuka-R411 million.

UMshunqisi uthe yize kungekho okubhalwe phansi asekuthole kumasipala kodwa yinto engamjabulisa ukuthi axhaswe ngoba kade ehlale ecela usizo ngisho nakuhulumeni kazwelonke.

"Ngiyathandaza ukuthi lokhu kube yiqiniso. Kubiza yonke into uma uhlela umcimbi. Abantu bazitshela ukuthi abaculi kuphela kanti isteji, i-sound system, amalambu nezimvume ezikhokhelwayo. Kunezinto eziningi eziba lula uma unoxhaso. Ngonyaka odlule nje ngicabanga ukuthi isiteji, amalambu ne-sound kwakugijima la ko-R700 000," kusho uMshunqisi.

Uthe kubalulekile ukuthi njengabahleli bemicimbi bayihloniphe imali yebhizinisi ngokubekela unyaka ozayo abakutholayo. Noma kunjalo kodwa akwenele yingakho behlale bedinga usizo kuhulumeni nasezinkampanini ezizimele.

"Uma unomcimbi omkhulu njengalo wethu ngeke ukwazi ukuzenzela ngaphandle koxhaso ngoba nabantu basuke belindele ukuthi unyuse izinga ngaso sonke isikhathi."

Echaza ngomcimbi wakhe, ozobe ugubha iminyaka eyisishiyagalombili nonyaka, uthe noma indawo ingakaqinisekiswa kodwa ubona iPrincess Magogo Stadium izowufanela.

Uthe umcimbi wakhe uheha izivakashi ezahlukene futhi uhlanganisa namalokishi.

"Umcimbi wethu ngowokwamukela ihlobo nokwamukela izivakashi eThekwini. Wumcimbi ohlanganisa bonke abantu futhi obathuthukisayo. Akuliwa, akukaze kube umcimbi oba nomsindo noma onezinkulumo ezingezinhle. Uma iqala kuvula abaculi abasakhula kukhuphukele kwabafana nathi. Siqasha abantu abaningi baselokishini, hhayi kuphela KwaMashu kodwa koNtuzuma, Nanda namanye," kusho uMshunqisi.