Injabulo uBabes Wodumo eqokwa emiklomelweni yaseNigeria

INDLOVUKAZI ye-gqom,' uBabes Wodumo, izomela iNingizimu Afrika eNigeria emiklomelweni amaMusic Video Africa Awards (MVAA) ngasekupheleni konyaka. Imiklomelo kuzoba ngokwesibili ikhona nonyaka njengoba iqale ngoSepthemba ngo-2024 eLagos.

UBabes uqokwe emunxeni weBest Performing Artist of the Year.

Imizamo yokumthola izolo ayiphumelelanga njengoba ucingo lwakhe belukhala lungabanjwa.

Nokho kwi-Instagram uhalaliselwe abantu abahlukene okubalwa kubo nomsakazi woKhozi FM uDudu "Lady D" Khoza.

"Mah wami," kubonga uBabes kuye efaka nomfanekiso wenhliziyo.

UBabes, ozakhele udumo ngengoma ethi Wololo, uqhathwe noS.I.O waseLiberia.

Lo mculi owayeshade noMampintsha, ongasekho, uqokwa nje, umatasa nokupheka umsebenzi wakhe omusha.

Omunye umculi waseThekwini oqokiwe wuNaledi Aphiwe osemunxeni we-Upcoming Artist of the Year. Usomahlaya uMdu Nkosi ungomunye wabazomela izwe.

Ukuvota kuzoqala ngo-Agasti 10 nge-link engakakhishwa.

Ngokwe-website yemiklomelo, inhloso yayo wukuqhakambisa nokuhlonipha abantu base-Afrika abanethalente kuma-music video.