Abathandwa bagonyuluka ngokunyundela u-Ayanda Ncwane

USOMABHIZINISI ongusaziwayo u-Ayanda Ncwane uthi ngabe ufuna ukusheshe azigugise uma engaphika nokushiwo ngabantu ngaye befuna ukungcolisa igama lakhe.

U-Ayanda, owayeshade noSfiso Ncwane owayecula umculo wokholo, ukusho lokhu engxoxweni neSolezwe ngezinsolo ezenziwa yiqembu lowokholo ayeliphethe, Abathandwa, elathi wadla imali yalo.

Leli qembu lodumo lwengoma ethi Ehhe Moya Wami laliqopha enkampanini yakhe iNcwane Communications lashiya ngo-2023 lajoyina uDondolo Music Production.

Lahamba likhomba ngenjumbane u-Ayanda lithi akakaze alinike imali yama-royalties kunalokho wayephonsa eyokunandisa emicimbini kuphela.

Sekuvele ukuthi lokhu kwakungamampunge - kuyindlela yokuzimaketha kwazise alikaze libe nengoma eyafika ezingeni le-Ehhe Moya Wami.

Lokhu kudalulwe ngobeyilungu uCebile Shange, othe yena noMinenhle Ngubane ongumsunguli, Manqoba Ngubane obengumgcinimafa, Mfundo Mthethwa noZakhele Zungu, bakhethe ukwesula ngoMashi ngoba kukuningi obekubadla.

"Thina sobathathu besiyingxenye enkulu yobuholi beqembu. Nakhona futhi emaphepheni kwaphawula thina kodwa besiholwa wuPercy Nyoka okunguyena obesola umam'Ncwane ngokuthi wadla imali yeqembu. Lokho besazi ukuthi akulona iqiniso kodwa ngenxa yengcindezi ebesiphilisana ngayo ngaphakathi eqenjini kwasiphoqa ukuthi sigcine sivumelana ngawo la manga," kusho uCebile.

Imizamo yokuthola uPercy ocula phambili eqenjini ayiphumelelanga ucingo lwakhe lukhala lungabanjwa.

UCebile uthe bakwazile ukuxolisa bukhoma ku-Ayanda kodwa ngenxa yokuthi bangcolisa igama lakhe emphakathini, babone kufanele ukuthi baphinde bacele intethelelo esidlangalaleni.

"Umam'Ncwane usisize kakhulu kusukela singelutho kuze kuba wukuthi iNingizimu Afrika yonke iyasazi. Manje sithe asikwazi ukuvele siqhubeke nje kanjalo nempilo  ekubeni yena ekhala ngesenzo sethu," usho kanje.

Udalule ukuthi abaxolisi ngoba befuna isiqalo esisha emculweni kunalokho sebekhethe ukuthatha izindlela ezahlukene ezingahlangene nawo.

U-Ayanda uthe bese kuphele izinyanga bezama ukuxhumana naye bagcina bexolisile.

"Azisangihlukumezi izinto ezinje ngoba kade abantu besho izinto engingazazi ngami. Njengoba  ngimuhle kanje ngabe ngishwabene ebusweni manje angikwazi ukucasulwa wukuthi abantu bathini. Lokho kungangenza isalukazi ngisemncane ngithi ngiyaqhamuka abantu bathi 'hhawu, wu-Ayanda lo osenje!'," kusho u-Ayanda.

Uthe kade akudlulisa enhliziyweni yakhe ngoba ngabe akathuthuki ngempilo.

"Bafika kimi umhlaba usubashiyile babona sengathi kungenxa yezinyembezi zami. Ezami angizikhaleli kumuntu ngiziyisa kuNkulunkulu. Yibo abaziyo ukuthi babehlangene bethi bafuna ukwenzani," kuqhuba u-Ayanda.

Uveze ukuthi akaphumile kwezokungcebeleka kunalokho usajabulela ukumenywa ayokhuluma nabesifazane ngezihloko zokuzithuthukisa.