Umaskanda uzoshiyelana inkundla nomrepha wase-USA
UMCULI kamaskandi uThami Mathe uzosina adedelane nezingwazi zaphesheya kwiMaasai Global Festival eTanzania ngempelasonto Isithombe: SITHUNYELWE
UMCULI kamaskandi osasafusa, uThami Mathe, uthole ingqayizivele yethuba lokuyonandisa kwindumezulu yomcimbi wamazwe ngamazwe, iMaasai Global Festival e-Arusha, eTanzania, ngoMgqibelo.
UThami (37) wasesigodini saseNgunjini, KwaDlangezwa, eMpangeni, uthe ubonga uNkulunkulu ngethuba lokushiyelana inkundla nezingwazi zamazwe ngamazwe.
Kubaculi azoshiyelana nabo inkundla kubalwa umrepha wase-USA, uLil’ Romeo.
Lo mculi wodumo lwengoma ethi Sela Lentombi, uthe kuzobe sekungokwesibili eshiya izihlwele zisahalela impinda.
UThami uthe useke wahlabana ngendondo kuma-Eastern Cape Music Awards nahlonishwa ngayo njenge-Best Backing Vocalist nakumaMzansi Traditional and Cultural Music Awards.
"Sengihambele amazwe abalelwa kwayisishiyagalolunye, ngihamba noMbuzeni noma ngihamba ngedwa."
Uthe ukhule ebukela kubaculi abanjengoLucky Dube, Is’mael, R Kelly neWestlife.
Uthe uzoya kulo mcimbi waseTanzania nomculi wase-Eastern Cape, uNomndakazana Dlamini.