Bazokwamukela unyaka omusha ngomculo wokholo ne-jazz
UMCULI wokholo odlala nopiyano, uSiyabonga Nxumalo, ungomunye wabazonandisa kwi-Asingene Siphila Jazz & Gospel Music Picnic eVryheid, ngoDisemba 31
Image: Instagram
ASEKUVUTHONDABA amalungiselelo omcimbi i-Asingene Siphila Jazz & Gospel Music Picnic ozodonsa izinsuku ezimbili eVryheid, kusuka ngoDisemba 31.
Lo mcimbi wokuhlukanisa unyaka uzoba seBlack Horse.
Izethameli zizohlukanisa unyaka ngomkhuleko nomculo wokholo njengoba kuzobe kukhona abaculi nabefundisi.
Umcimbi kulindeleke ukuthi udonse ubusuku bonke njengoba uzoqala ngo-6 ntambama kuze kube u-6 ekuseni
Kuboshelwe uMxolisi Mbethe, Thobekile, Siyabonga Nxumalo, Mfundisi Vusi Gama, MC Kwenzeka Thabede, Thoko Ndlangamandla nabanye.
Ngakusasa endaweni efanayo, kuzoba ne-picnic ye-jazz. Abaculi be-jazz abasohlwini yiPhongola Jazz Band, Imacsoul, Thami Mdluli, Ubuhle BeMondlo, Busi Mhlongo Jazz Club nabanye. Uhlelo luzobe luphethwe uMakitaza noMandla Mdletshe.
Amasango azovulwa ngo-12 emini.
I-Asingene Siphila Jazz & Gospel Music Picnic ingaphezu kokuba umcimbi, njengoba ihlanganisa umculo nosiko futhi yamukela u-2026 ngenhloso nendumiso.
Amathikithi aqala ku-R150 kuthi awezinsuku zombili abe u-R250 eWebtickets.
Khonamanjalo: Baqinisekisiwe abaculi abazinandisa kwiDurban Jazz Festival ezoba seMgababa Coastal Resort ngoLwesihlanu.
Lo mcimbi wagcina ubhuntshe ngemizuzu yokugcina ngonyaka odlule.
Kuzonandisa uSjava, The Soul, Zamajobe, Simmy, Naima Kay, Umafikizolo nabanye. Amathikithi aqala ku-R300 eWebtickets.