Usadonsa ngaphakathi umculi owaboshelwa elokudlwengula

UMCULI we-kwaito owagwetshwa iminyaka engu-15 ejele ngo-2017 ngecala lokudlwengula umshana wakhe, uSipho "Brickz" Ndlovu usaqhubeka nokudonsa isigwebo sakhe ngaphakathi.

UBrickz, owazakhela udumo ngezingoma okubalwa kuzo iSweety MaBaby, waboshelwa icala lokudlwengula umshana owayeneminyaka engu-16 ngaleso sikhathi.

Waboshwa ngo-2013 ngesigameko esenzeka kwakhe eRuimsig, eRoodepoort, waphuma ngebheyili kwaze kwaba uyagwetshwa ngo-2017.

Ngempelasonto kuqubuke amahlebezi okuthi usekhishiwe ejele. Aqubuke emuva kombhalo ofakwe yiciko uNtsiki Mazwai enkundleni yokuxhumana i-X.

"Usaziwayo owaboshwa ngokudlwengula umshana wakhe usekhishiwe ejele. Kumele ngamukele ngibhekane nesimo. Iyona mpilo le," kubhala uNtsiki.

Emuva kwalokho baningi abebezibuza ukuthi ngabe ngubani okukhulunywa ngaye abanye balimisa ngesihloko elokuthi usho uBrickz.

Nokho okhulumela uMnyango wokuHlunyeleliswa kweziMilo, uSingabakho Nxumalo, ukuchithile ukuthi uBrickz usengaphandle.

"Yizindaba ezingamampunge lezi. Usesejele," kusho uNxumalo ngamafuphi.

Akaphendulanga ukuthi usekulungele yini ukudedelwa ngoshwele njengoba esedonse uhhafu wesigwebo sakhe.

Ezinyangeni ezedlule kuvele imibiko ethi uBrickz uthweswe iziqu zezifundo zokumaketha eBoston City Campus.

Izithombe nama-video asabalala ezinkundleni zokuxhumana ayemveza emukela isitifiketi emcimbini okuthiwa wawusejele iLeeuwkop, eGoli, lapho edonsa khona.

Umbiko wacaphuna isihlobo sakhe esingadalulwanga esathi uyakujabulela ukufunda ngaphakathi futhi uzimisele ngokuqhuba izifundo zePolitical Science.