I-KZN imelwe yinqwaba kowezindondo zeTrace

UQHUDE manikiniki zindala zombili kuma-Trace Awards azokuba namhlanje e-The Mora, eZanzibar, eTanzania.

Le ndumezulu yomqhudelwano wezindondo izosakazwa bukhoma eziteshini zethelevishini ezibizwa nge-Trace kwi-DStv Channel, kusukela ngo-5.30 ntambama.

Ayisalanga ngaphandle iNingizimu Afrika, kwi-Best Song of the Year imelwe uTyla ngengoma ethi Jump, uTyler ICU ngethi Mnike, noTitom & Yuppe ngethi Tshwala Bam'.

Nakwi-Best Collaboration kukhona uTitom & Yuppe behambisana nomculi waseNigeria, uBurna Boy engomeni ethi Tshwala Bam' Remix.

UTyla ubuyile nakwi-Best Music Video ngengoma ethi Jump. UKamo Mphela noMakhadzi baboshelwe kwi-Best Dancer. Emunxeni we-Best DJ elakuleli limelwe nguTyler ICU ngeMnike, u-Uncle Waffles ngeWadibusa, uDJ Maphorisa ngeMnike, noKabza De Small ngeMithandazo.

Umrepha waseLovu, eThekwini, uNasty C nozakwabo uMaglera Doe Boy baqokwe kwi-Best Hip Hop.

Emkhakheni we-Best Global African Artist babuyile oTyla, noTyler ICU.

Insizwa yaseLamontville, uThuthuka "Dlala Thukzin" Zindlovu, ufakwe emkhakheni we-Best Male Artist ekubeni uMakhadzi esimele kowe-Best Female Artist.

UNolwazi "Nkosazana Daughter" Nzama waseThekwini, uqhathwe nozakwabo bakwamanye amazwe kwi-Best Newcomer. Kwi-Best Producer kuboshelwe uKelvin Momo ngeSewe, DJ Maphorisa ngeMnike, noKabza De Small ngeMithandazo.

I-Spirit of Praise 10 isemkhakheni we-Best Gospel Artist. Amaciko aseNingizimu Afrika, adlana imilala wodwa kwi-Best Artist (Southern Africa) ngoba kuboshelwe Inkabi Zezwe (Sjava noBig Zulu), De Mthuda, Dlala Thukzin, Tyla, Uncle Waffles noTyler ICU.