’Nami uJub Jub wangidlwengula’ - Masechaba

USEMISIWE kwiMoja Love umethuli wohlelo Uyajola 9/9, uJub Jub, kulandela ivideo ka-Amanda Du Pont omsole ngokumdlwengula nokumhlukumeza iminyaka emibili.

Izolo ebusuku nowayengumsakazi weMetro FM, uMasechaba Khumalo, uphumele obala eseka u-Amanda Du Pont, wathi naye wadlwengulwa wuMolemo Maarohanye, odume ngelikaJub Jub, eNaturena.

Uthe lokhu kwenzeka besathandana beneminyaka engaphansi kuka-20, kubo kanina kaJub Jub, uMama Jackie (Jackie Maarohanye). UMasechaba uthe naye wamdlwengula esayintombi nto.

I believe @AmandaDupont. Molemo Maarohanye (Jub Jub) raped me too. It happened in Mama Jakie's house in Naturena. He was my boyfriend. I was a teenager. I was a virgin. https://t.co/OcL9zY8YNN

— Masechaba Khumalo 🇿![CDATA[]]>🇦 (@MKhumalo___) December 2, 2021

Kungokwesibili nokho uMasechaba ephumela obala ngokunukubezwa ngokocansi. Esiqeshini sikaMacG esashicilelwa kuYouTube ngoMeyi 30 ngo-2019, waveza ukuthi wanukubezwa owesilisa owayethandana nonina ngokocansi esaneminyaka ewu-9, besahlala eMelika.

Ngemuva kwezinsolo ezibhekene noJub Jub, iMoja Love ikhiphe isitatimende iziqhelelanisa nohlelo lukaMac G obeludlala kuChannel O icacisa ukuthi ayihlangene nalo. Ithe izithathela phezulu izinsolo zokuhlukunyezwa kwabantu besifazane ngakho isinqume ukumumisa uJub Jub.

U-Amanda Du Pont akagcinanga ngokuphumela obala ngezinsolo zokuhlunyezwa wuJub Jub kodwa uphinde wagxeka uMac G neChannel O ngokushicilelwa kwesiqephu esithunaza isithunzi sabantu besifazane.

UJub Jub akakathi vu ngalezi zinsolo.