NAMHLANJE wonke amafulegi akuleli emkhakheni wezokungcebeleka andizela phansi njengoba kufihlwa omakadebona endimeni yokulingisa.
Ngalo Mgqibelo kuzobe kufihlwa izingwazi zabalingisi ebezihlonishwa ngamagalelo azo emkhakheni wasesteji, kwithelevishini nasemafilimini, uTeboho "Darlington Michaels" Ndarana obesaziwa ngelikaPapa G noSello Motloung.
Omunye okulindeleke ukuba afihlwe namhlanje wumculi obengusomahlaya, uPhilani "Mfundisi uNtshebe" Mabanga. Enkonzweni yesikhumbuzo sikaMfundisi uNtshebe ebibanjelwe e-Apostolic Gospel Church International, esigcemeni saseRamakonopi, eKatlehong, kuvele ukuthi leli ciko belisanda kubamba iqhaza emdlalweni oyingqophamlando, iShaka Ilembe.
UJerry Zwane weTaxido Arts, uthe uMfundisi uNtshebe ungomunye wabalingisi abasha abazobonakala kulo mdlalo.
"Okubuhlungu ukuthi ngeke esakwazi ukuzibona elingisa kulo mdlalo ngoba ushone ngaphambi kokuthi lo mdlalo usakazwe kwithelevishini."
UMfundisi uNtshebe, obedabuka eNquthu kodwa obesehlala eKatlehong, udlule emhlabeni ekwakhe ngoLwesihlanu emuva kokukhala ngokuphathwa yikhanda. Ngaphandle kwama-albhamu akhe ayebizwa ngeNkonzo KaNtshebe, wabuye wasebenza noBhekumuzi Luthuli engomeni ethi Akuvumi Remix neMithente engomeni ethi Lemini Iyeza Nakuwe. Abathandi beR&B bazomkhumbula enguKalashnikov kanti abe-hip hop bamazi engu-2Black 2Strong.
NoPapa G ushone ngoLwesihlanu, emuva kokuxinwa wukugula isikhashana. Ekhuluma enkonzweni yesikhumbuzo sikaPapaG ebiseSoweto Theatre, umzukulu wakhe, uKarabo Ndarana, uthe yize ungakakwamukeli ukuhamba kukamkhulu wakhe kodwa uphumule ezinhlungwini.
Uthe indlela ebebekhonzene ngakhona ngayo, ubezitshela ukuthi ubezoba naye uma egqoka ijazi noma esethenga imoto yakhe yokuqala.
UXoli Noah obesondelene noPapa G, uthe ugqemeke udume lwengozi ngaleli qhawe ngenxa yokuthi miningi imisebenzi ebesebeqalile ukuyenza ndawonye.
Yize uSello noPapa G bezofihlwa emathuneni aseWest Park Cemetery eGoli, emuva kwezinkonzo zomngcwabo ezizobanjelwa ezindaweni ezahlukahlukene, kodwa bekungakacaci ngomngcwabo kaMfundisi uNtshebe.
Inkonzo yomngcwabo kaSello iseSt Herbert's Catholic Church e-Alexander ekubeni ekaPapa G ise-Uncle Tom's Community Hall e-Orlando West, ngo-9 ekuseni.
