UYACHICHIMA yinjabulo usaziwayo waseMgungundlovu, uNonkanyiso "LaConco" Conco.
Le ntokazi ibonga uSomandla ngokuhlabana ngomsebenzi wokuba wumethuli omusha wohlelo lomshado kuMzansi Magic, i-Our Perfect Wedding.
Ephawula ngokunyelwa yinyoni esandleni, uLaConco uthe uNkulunkulu usekuphindile lokho, maqede wafaka i-video yamanqampunqampu eziqephu ezizobe zikhonjiswa ohlelweni kusukela ngeSonto elizayo ngo-7 ebusuku.
Inkonyane izobe ingathuki isisinga kuLaConco njengoba eseke wethula uhlelo obelusihloko sithi Ingane Yami kuMzansi Magic futhi wasakaza nasesiteshini esenza inzuzo KwaZulu-Natal iVuma 103 FM. Uzakhele ugazi ngokubamba iqhaza ohlelweni obelusakazwa kwiShowmax nakuMzansi Magic, iReal Housewives of Durban.
Kwenzeka lokhu nje uLaConco usanda kuziqhelisa enkampanini yezokuvakasha esolwa ngokuqola amakhasimende, iTshiamo Travels.
Ubhale ekhasini lakhe kwiFacebook echaza ngobekumhlanganise nenkampani kaPearl Khanyi Khumalo, emuva kokuba amakhasimende abalelwa ku-22 esale dengwane ohambweni lwaseBali, ngenxa yokuhluleka kwayo ukuwahlelela ibhanoyi nendawo yokulala. ULaConco uxolisile maqede wacacisa ngobudlelwano bakhe nenkampani.
Waduma ngesikhathi kubikwa ukuthi ungunina wengane yowayengumengameli wezwe, uMnuz Jacob Zuma.
Eminyakeni eyedlule ubeyisishoshovu samalungelo ezintombi nto njengoba naye ubehambela uMkhosi woMhlanga. Ngaphandle kokwethula izinhlelo zethelevishini, uLaConco, uyintatheli ewufundele umsebenzi, uneziqu azithola eRosebank College futhi useke wabhalela iphephandaba eliwuzakwabo waleli, Isolezwe.