Umlingisi woMkhokha The Curse, uKwanele Mthethwa, ukhonjwa efilimini yamahlaya esihloko sithi Lobola Man.
Isolezwe Ngempelasonto lithole ukuthi uKwanele (28) uzolingisa kule filimu nozakwabo, okubalwa kubo uSandile Mahlangu, Thembsie Matu, Lawrence Maleka noNimrod Nkosi. Ngokusho kwesimemezelo esinanyekwe enkundleni yezokuxhumana eyaziwa ngeX, iLobola Man izoqala ukukhonjiswa kwiNetflix kusukela ngoJulayi 12.
Imizamo yokuthola uKwanele ukuze aphawule ayiphumelelanga kwaze kwashaya isikhathi sokushicilela.
UKwanele, olingisa indawo kaNobuntu, uqale wanyamanambana kubabukeli boMkhokha esafika kulo mdlalo njengoba esabambele uzakwabo uKhwezi Ndlovu, ngenxa yokuthi inkonyane beyisathuka isisinga futhi ubengene endaweni yeqhalaqhala elinguKhwezi.
Ngokuhamba kwesikhathi bagcine sebemamukela ngezandla ezimhlophe.
Yize uKwanele eqale ukwaziwa engu-Ayanda kwiSithembiso kodwa uzakhele ugazi kakhulu esenguPhumeza, intombi kaBrutus Khoza kwiThe Queen.
Lo mlingisi usebuya nakwi-Imposter Season 2, Indandatho Yokukhanya, Abomama, Entangled, Redemption nakuMbuso.
UKwanele waphothula uGrade 12 eBurnwood Secondary ngo-2018.