Bahlukane phakathi ngemfihlo yokuzigcina emusha usaziwayo okhuza ibuya kwiReal Housewives of Durban Season 4, uNonku Williams.
Le ntokazi ifake i-video ebiveza ijovwa wudokotela ubuso. Abalandeli bayo bahlukane phakathi njengoba kukhona abagxeke uNonku ngokufuna ukuzenza uMichael Jackson nokungafuni ukwamukela ukuthi seyihambile iminyaka kuye.
Nakuba kunjalo kodwa abanye bathe yilungelo likaNonku ukwenza into ayithandayo ngemali yakhe.
"Obhodlindlala nokhothipani abathule," kusho omunye wabalandeli bekhasi likaNonku ku-Instagram.
Ephawula ngokumenze wavulela kabusha isikhumba sakhe ngohlelo lweBotox, uNonku uthe ayikho inkinga ngokuzinakekela nokuphatha kahle isikhumba.
"I-Botox ingaba yisikhali sakho esifihliwe ekubukekeni nasekuzizweni umuhle."
Uthe abantu abavalelise ekubeni yimixhiliba kodwa bamukele ukuzethemba.
"I-Botox akusiyo eyokulwa nobuxhiliba kuphela kodwa imayelana nokugubha ubuhle kuzo zonke izigaba zempilo. Ukuwotawota isikhumba kuyashesha futhi akunazinhlungu kodwa imiphumela yalolu hlelo izikhulumela yona."
Uthe abantu bangazidalela bona ukuhlala bebasha ngokuwotawotwa.
"Ukuthi uvimba imibimbi noma uvuselela ubuhle bakho bendalo kodwa umqondo wokusebenzisa imali yakho kuwe uyisenzo sokuthazinda," kuphetha uNonku onengane nomculi wokholo ongasekho, uSifiso Ncwane. Le ntokazi isanda kuhlukana kabuhlungu nesoka ebelisanda kuyithembisa umshado, uDumisani Ndlanzi, waseRichards Bay, ovele ngoDisemba ethembisa enye intokazi umshado.
UNonku uzobonakala kwiReal Housewives of Durban noSorisha Naidoo, JoJo Robinson, Maria Valaskatzis, Slindile Ndlovu, Sbahle Thompson, Nqobile Ndlela noZama Ngcobo kwiShowmax kusukela ngoFebhuwari 9.