UNOMPILO Maphumulo ozakhele olukhulu ugazi kuZalo ngokulingisa indawo kaNosipho Xulu, ukhuza ibuya kulo mdlalo osahamba phambili kuleli.
Lezi zindaba ziqinisekiswe oyisikhulu sezokuxhumana enkampanini edidiyela lo mdlalo iStained Glass, uYvonne Siphuka. Uthe bajabule kakhulu ngokubuyela kukaNompilo kulo mdlalo osakazwa kwiSABC 1 phakathi nezinsuku ngo-8.30 ebusuku.
"Ukubuya kwakhe kuthembisa ukugcina ababukeli belokhu belangazelele iziqephu ezilandelayo njengoba ezovezwa esejele. Useqalile ukushutha futhi sesijahe kabi ukuba ababukeli babone ukuthi sibaphatheleni kulo mdlalo."
UNompilo uhambe kuZalo nyakenye eseyosebenza kwiGenerations The Legacy. Eshiya kuZalo, uNosipho wayesegqunywe ejele ngokubulala umyeni wakhe uMfu Gwala (okuyindawo ebilingiswa nguMenzi Biyela).
Kwenzeka lokhu nje, ababukeli boZalo bese beqala ukwehla ngesikhulu isivinini emuva kokuhamba kwabanye babalingisi balo mdlalo abanohlonze.
Ngokwezibalo ezenziwe yiBroadcast Research Council of South Africa ngoMeyi 2024, Uzalo selunababukeli abawu-5 million ekubeni iGenerations The Legacy ilele isibili ngabawu-4 million. Lokhu kuchaza ukuthi lo mdlalo sewulahlekelwe ngababukeli abangaphezu kuka-6 million njengoba uke waba nabawu-11 million eminyakeni eyedlule.
Ngokwemithombo engaphakathi, izibalo zitatazelise abadidiyeli bomdlalo njengoba baze balanda nosaziwayo abacabanga ukuthi bayizintandokazi okubalwa owayeyisihlabani seBafana Bafana neKaizer Chiefs, uSiyabonga "Bhele" Nomvete, owayengukaputeni weBafana Bafana, uNeil Tovey nomlingisi uBrenda "Brinzo" Mhlongo.
Onguphrojusa woZalo, uKing David Mokwevho, ucashunwe ethi abanavalo ngoba basaqengqeleza phambili kozakwabo. Ubuye wasola ukuthi ababukeli bemidlalo yethelevishini bantshontshwe yiziteshi ezifana noNetflix noShowmax. Nakuba kunjalo, uthi bona basazishaya isifuba ngokuthi basahlezi phambili ngokwezibalo zababukeli.
Khonamanjalo: Umdlalo owuchungechunge osakazwa kwi-etv phakathi nezinsuku ngo-7 ebusuku iHouse of Zwide, ugqemeke udume lwengozi ngokushiywa inkakha yomlingisi, uVusi Kunene.
Izindaba zokushiya kukaKunene, olingisa indawo kaFunani Zwide, ziqinisekiswe yi-e.tv. Ngokwesitatimende, uKunene useqedile nokuqopha isiqephu sakhe sokugcina futhi uzogcina ukubonakala kulo mdlalo phakathi nale nyanga.