UPenny Lebyane ubuyela kwiSABC ngohlelo olusha
UPenny Lebyane obuyela ekwethuleni izinhlelo zethelevishini nge-Eintlik Let’s Connect
Image: Sithunyelwe
UBUYELA kwiSABC ngohlelo olusha lwethelevishini kusuka ngenyanga ezayo uPenny Lebyane oshiye iRadio 2000 eminyakeni emibili edlule.
UPenny, oneminyaka eyibambile kwezikaqedisizungu, wajoyina iRadio 2000 ngaphambi kokuhamba ngo-2024. Wayethula uhlelo i-Inspired Sunday ngeSonto ngo-3 ntambama.
Manje umenyezelwe njengomethuli wohlelo olusha i-Eintlik Let’s Connect oluzoqala kwiSABC2 kusuka ngoFebhuwari 9.
Luzodlala bukhoma ngoMsombuluko kuya kuLwesihlanu ngo-4.30 kuya ku-5.30 ntambama.
UPenny, osanda kumenyezelwa njengomkhulumeli wenhlangano iCollen Mashawana Foundation, uzobe ebambisene noFran-Rico Lucas oke wethula i-50/50.
“Ukubuyela kwiSABC2 nsukuzonke ngohlelo olufana ne-Eintlik Let’s Connect kuyikho konke engikusebenzele kule minyaka engu-25 ngisemkhakheni wezokusakaza. Kungaphezu kohlelo, yinkundla yezingxoxo zangempela, abantu bangempela nokuxhumana kwangempela. Ngemuva kwale minyaka embalwa engidlule kuyo, lokhu kungaphezu kokuba wumsebenzi, yisiqalo esisha nethuba lokwakha into ebalulekile nabantu baseNingizimu Afrika usuku nosuku,” kusho uPenny.
Lo makadebona akamusha ezinhlelweni zezingxoxo njengoba eke wethula iMotswako kuyona iSABC2 eminyakeni edlule.
UFran-Rico Lucas ozokwethula uhlelo noPenny Lebyane kwiSABC2
Image: Sithunyelwe
Kwi-Eintlik Let’s Connect kulindeleke ukuthi kube nezimenywa ezahlukene okubalwa kuzo uZakes Bantwini, Somizi Mhlongo, Gail Mabalane nezinye.
Uhlelo luzohambela izindawo ezehlukene ezweni kukhulunywe ngezihloko eziningi ezibalulekile.
UFran-Rico uthe kufana nokubuyela ekhaya ukunikwa lolu hlelo.
“Ukuba kwithelevishini kuyiphupho lami lakudala engibe nalo kusuka ngisakhula futhi ukulibona lifezeka kwiSABC2 yinto eyigugu kimi,” kusho uFran-Rico.