Izokwethulwa osaziwayo imiklomelo ekwiSABC 1 ngempelasonto
Nqobile Khwezi
Image: Instagram
SEBEDALULIWE osaziwayo abazophatha uhlelo emiklomelweni amaNational Arts and Culture Awards (NACA) namaSouth African Sports Awards, yomibili ezokhonjiswa bukhoma kwiSABC 1 ngempelasonto.
Yomibili le miklomelo ezoba seSun City, yenziwa wuMnyango wezeMidlalo, ezobuCiko namaSiko kuzwelonke.
Kuzoqala ngamaNACA ngo-8 ebusuku ngoMgqibelo. Imiklomelo ihlonipha abasemkhakheni wezobuciko namasiko ezweni jikelele.
Isiyonke imiklomelo ekhishwayo ingu-30 eminxeni ehlukene etholwa ngabangenele ngemisebenzi yaphakathi kuka-1 Ephreli 2024 kuya ku-31 Mashi 2025.
I-SABC iqinisekise ukuthi uKatlego Maboe noTracey Lange yibo abazophatha uhlelo. Ngaphambi kwemiklomelo, kuzokhonjiswa izimenywa zisangena kukhaphethi obomvu ohlelweni oluzoqala ukusakazwa ngo-7.30 ebusuku.
Uhlelo luzobe lubanjwe uZola Nombona noPalesa Mosiea. KumaSouth African Sports Awards ngeSonto, nakhona ukusakazwa bukhoma kuzoqala ngo-7.30, ebusuku ngezicukuthwane ezingena kukhaphethi obomvu.
UZOLA Nombona uzobe ethula okuzobe kwenzeka kukhaphethi obomvu kumaNational Arts & Culture Awards ngoMgqibelo
Image: Sithunyelwe
Uhlelo luzobe lwethulwa wuRyle de Morny noNqobile Khwezi. Olwemiklomelo lona luzophathwa nguZanele Potelwa noJerome Slim Du Ploy kusuka ngo-8 ebusuku.
Emiklomelweni yezemidlalo okuzobe kungeka-18 ikhona, kuzohlomula abadlali, abaqeqeshi, abalandeli nabanye emikhakheni yezemidlalo.
Phakathi kwabaqokiwe kubalwa kubo u-Akani Simbine, Mpumelelo Mhlongo, Tatjana Smith nabanye abaningi.