Kuboshelwe izilomo emdlalweni omusha kwiSABC 1
UKWENZO Ngcobo olingisa indawo ka-Alex Chabane kwiSoon Come Night eqala ngeSonto kwiSABC 1
Image: Sithunyelwe
INTANDOKAZI yomlingisi waKwaZulu-Natal uKwenzo Ngcobo izodlala indawo ephambili emdlalweni omusha iSoon Comes Night ezoqala kwiSABC 1 ngo-8 ebusuku ngeSonto.
UKwenzo, ogqame elingisa indawo kaQhawe kwiThe Wife, uzobe ewu-Alex Chabane kulo mdlalo oyiziqephu eziyisithupha.
Umdlalo uveza impilo yeminyaka yawo-1990, ukhuluma ngepolitiki, ukushintsha kwempilo yabantu nokundlondlobala kwezigebengu zakamuva.
UKwenzo uzobe elingisa indawo ka-Alex Chabane oyisishoshovu se-ANC esilwela inkululeko esibuyela ekhaya sijabulela impumelelo yokunqoba impi.
UChabane uzimisele ngokusebenzisa amava anawo amsize ukukhulula iNingizimu Afrika ukuze athole okumfanele.
"Ngenxa yokuthi waxabana nayebambisene nabo kwezepolitiki, uzithola efunwa wuSakkie Oosthuizen odlalwa wu-Albert Pretorius, owayeyiphoyisa lobandlululo eselisebenza nababeyizitha zakhe."
UKwenzo uzobonakala kulo mdlalo nje, uhambela phezulu emuva kokuhlabana ngendondo kumaSimon Mabhunu Sabela KZN Film & Television Awards ngempelasonto.
Uthole eyeBest Actor kwithelevisihini ngendawo kaNhloso Gasa kwiScandal! kwi-e.tv.
Ekhuluma emcimbini ubonge uNkulunkulu nabazali bakhe ngokumeseka. Abanye abalingisi abazobonakala kwiSoon Comes Night yindodakazi kaSomizi Mhlongo uBahumi Mhlongo ozoba nguKefilwe, Didintle Khunou onguThato Sekoati, Anelisa Phewa onguVincent, Nyaniso Dzedze odlala indawo kaKhumalo noSisanda Henna onguMpiyakhe Maseko.