Ithathe elinye igxathu ekaFelix Hlophe emiswa kwiGagasi FM

SIBASHIYE behlukene phakathi abalaleli beGagasi FM isinqumo salesi siteshi sokuncisha umbhobho isilomo somsakazi, uFelix Hlophe, esisematheni kulandela ukusabalala kwama-video siqophisana ngamazwi nomkaso uTracy Smith-Hlophe.

Izolo ekuseni abalaleli basale bebuzana ngokungazwakali kukaFelix ohlelweni lwakhe iThe Uprising alusakaza noMinnie Ntuli.

IGagasi FM likhiphe isitatimende lathi lo msakazi unikwe ikhefu lamasonto amabili.

“Lokhu kuzovumela isiteshi ukuthi sihlole kahle isimo okubikwa ngaso ezinkundleni zokuxhumana nasemazikweni ahlukene nokunika uFelix ithuba lokuthi abhekane nezindaba zakhe ezidinga ukuthi azinake,” kusho isitatimende.

Sithe uyoze abuyele emoyeni ngoJanuwari 19.

Esikhaleni sakhe kwiThe Uprising kubanjiswe uHeazy ozoqhubeka noMinnie.

Ibinkulu injabulo kubalandeli bakhe bekubheke ngabomvu ukumuzwa esakaza noLinda “Mr Magic” Sibiya noSelbeyonce kusasa ebusuku ohlelweni lokuwelisa abalaleli ku-2026.

Lolu hlelo oluzongena ngo-9 ebusuku seluzobanjwa wuMr Magic noSelbeyonce kuphela.

Kube kuningi ukuphawula ekhasini leGagasi kwiFacebook ngalezi zimemezelo.

USiyacela Nzuza ushayele isiteshi ihlombe ngesinqumo saso wathi kumele kubekwe phambili impilo nesimo somqondo womuntu. Uthe ukuya emsebenzini ube ubhekene nezinkinga ezinzima ngasese futhi uziqinisa kungadala umonakalo omkhulu.

“Unyaka ozayo usengelinye ithuba futhi usengalwethula olunye uhlelo lokuhlukanisa unyaka,” kubhala uSiyacela.

UNtokozo T. Xaba uthe inqobo nje uma umsebenzi wakhe usaphephile, izingane zakhe zimdinga okudlula bona.

UPercy Kota Kunene uthe kwesinye isikhathi ubuholi buphoqa ukuthi kuthathwe izinqumo abanye abangahambisani nazo kungabhekwa gama lamuntu.

Abanye bakhombise ukungahambisani nesinqumo basabisa ngokuthi bazobe belalele Ukhozi FM abese befunge bagomela ukuthi luzobezwa ngendaba.

“Asikho isidingo salokhu Gagasi niyaphapha nithatha ngemizwa,” kubhala uMncedisi Mpetshwa.

UJunior Asanda Nxumalo uthe sebeyagagamela ngokuthathelwa izinqumo yizinkundla zokuxhumana.

“Akubona abalaleli benu njalo laba abangamfuni uFelix.”

NgeSonto uphoshozwayo wezindaba zosaziwayo, uMusa Khawula, uqale i-petition yokuthi uFelix amiswe emoyeni.

Izolo emini ibisisayinwe ngabantu abangu-917.

Okususe umsindo ngama-video kaFelix lapho ebonakale khona eshaya i-hoot ngaphandle komuzi umkakhe nezingane abekuwo.

Esengaphakathi ubethi ababuyele ekhaya nezingane.

Isolezwe libike ukuthi umkakhe ubehambe emuva kokucasulwa yisicelo somyeni sokuthi alungise izibiliboco kujatshulelwe ukuthi izingxoxo zelobolo likamnakwabo zihambe kahle.

Esitatimendeni uFelix uthe emuva kokuvela kwezindaba ezithinta yena, umkakhe wamukele isimemo somngani sokuyoshawa umoya nezingane.

Yena nomamezala ube esehamba eyobalanda.

Uthe ngaleso sikhathi kuphakame imimoya kodwa akaze ambeke isandla. Uthe badle uKhisimuzi ngokuthula nangenjabulo njengomndeni.