Usobishini uShebeshxt ebanjwa neselula esitokisini
KWANDA amacala kumculi weLikompo, uShebeshxt, etholwa neselula esitokisini
Image: X
USHEBESHXT ubanjwe nempahla engekho emthethweni ngemuva kokuthi umngani wakhe ongaphandle abelane ngesithombe esibonisa ukuthi ube ne-video call nalo mngani wakhe osezikhindini.
Lo mrepha waseLimpopo, uLehlogonolo “Shebeshxt” Chauke, kumanje uboshiwe futhi ulinde izinsuku zokuqulwa kwecala ngomhlaka17 kuya ku-19 Febhuwari, eNkantolo yeMantshi yasePolokwane.
Ubhekene necala lokushaya ngenhloso yokulimaza, ukubamba inkunzi esebenzisa isihluku, ukucekela phansi impahla namanye amabili okuzama ukubulala.
Njengoba esalinde ukuqulwa kwecala, uShebeshxt uzithole esenkingeni, njengoba kuthiwa iziphathimandla zasejele zibambe yena nesinye isiboshwa namaselula “nezinto ezihlobene nezidakamizwa.”
Kuthiwa iziphathimandla zasejele ziqale ukusola ukuthi kukhona okushaya amanzi ngemuva kokuthi umngani kaShebeshxt, uFlower weqembu iDhem Scott, efake ezinkundleni zokuxhumana isithombe se-video call noShebeshxt. Ojele baphuthume esitokisini ukuhlola ukuthi kukhonani.
Yize engakwazanga ukudalula amagama eziboshwa ezisalinde ukuqulwa kwamacala, okhulumela amaphoyisa aseLimpopo, uColonel Malesela Ledwaba, usiqinisekisile isigameko sabantu ababili ababanjwe nezidakamizwa ezingekho emthethweni.
Ummeli, uLot Ramusi omele umculi umrepha uShebeshxt, uthe ubikelwe ukuthi ikilayenti lakhe libhekene namacala akholelwa ukuthi awanasisekelo ngokomthetho.
ISITHOMBE okuthiwa sivuse emaqandeni iziphathimandla zasejele lapho okuboshwe khona uShebeshxt
Image: X