Kugqekezwe umuzi kwashiywa konke kwebiwa inyoka
|Published
Inyoka, ogama layo uGumede, eyebiwe eParkgate ngoLwesihlanu
Image: Reaction Unit South Africa
ISELA ligqekeze umuzi oseParkgate, eVerulam, layeka konke obekusendlini lashaya lachitha noGumede, inyoka ebifuyiwe.
Lesi sigameko senzeke ngoLwesihlanu lapho kwebiwe khona le nyoka eyi-Albino Corn engenabo ubuthi.
Inkampani yonogada iReaction Unit South Africa (Rusa) ibike ukuthi umnikazi womuzi ushiye uGumede ekuseni eya emsebenzini.
"Esebuya uthole ukuthi kulinyazwe i-burglar guard. Ukholwa ukuthi umsolwa ungene ngendluzula emzini wakhe wantshontsha inyoka," kusho iRusa.
Ithe uGumede unezinyanga eziyisithupha, ubude bakhe bulinganiselwa ku-60cm, unombala o-pink nomhlophe emzimbeni namehlo abomvu.
Inxuse ukuthi onolwazi ashayele ku-086 1234 333.