Iphumelele ibhekene nezinkinga iDrakensberg Extravaganza Music Experience
UMawhoo ecula kwiDrakensberg Extravaganza Music Experience eWoodstock Dam eBergville, ngoMgqibelo ebusuku
Image: Sibonelo Ngcobo/Independent Newspapers
UBE yimpumelelo ubhekene nezinkinga umcimbi iDrakensberg Extravaganza Music Experience obuseWoodstock Dam Picnic Site, eBergville, ngoMgqibelo ntambama kwaze kwasa izolo.
Lo mcimbi, obugubha iminyaka eyisishiyagalombili ukhona, usale wodwa abahleli bawo behoxisa eminye ohambisana nayo ngaphansi kweDrakensberg Extravaganza & Heritage Experience.
Ngokujwayelekile iDrakensberg Extravaganza & Heritage Experience idonsa izinsuku njengoba kuba nezingqungquthela zokucobelelana ngolwazi ngezihloko ezahlukene, umjaho iDrakensberg Marathon neminye.
UDJ Happygal usukumise ngisho nabebehleli phansi edlala kwiDrakensberg Extravaganza Music Experience
Image: Sibonelo Ngcobo/Independent Newspapers
Kulokhu umhleli uSipho Ndaba ukhale ngemali ngenxa yokugqoza kwabaxhasi wenza iMusic Experience kuphela.
Uthembise ukuthi ngeke aphele amandla ngokufaka izicelo zoxhaso ukuze imicimbi yasemakhaya ihleleke ngempumelelo.
Ngaphezu kwenkinga yoxhaso iMusic Experience iphinde yathwala kanzima iqala kuhlasela imvula ebihambisana nomoya.
Umaskanda uNkeshemba oshisa izikhotha ngengoma ethi Ngixolele Mtanami
Image: Sibonelo Ngcobo/Independent Newspapers
Nokho isheshe yadlula abantu baqala batheleka kwazise ngo-6 ntambama bekubukwa ibhola kobhazabhaza bama-screen abebefakiwe. Bekukhonjiswa umdlalo wamanqamu weCarling Knockout Cup okugcine kunqobe kuwo i-Orlando Pirates ngo 1-0 ishaya iMarumo Gallants ePolokwane.
Ngemuva kwalokho kube sekushiyelana inkundla abaculi noDJ abahlukene.
Phakathi kwabebenandisa kubalwa kubo uLucy Lu, Mawhoo, Professor, Nkeshemba, Dladla Mshunqisi, Blaq Diamond, Jumbo, DJ Happygal, Goldmax, Nobuhle, Thokozani Langa nabanye abaningi.
UDladla Mshunqisi ungene esiteji sekuphuma ilanga kwiDrakensberg Extravaganza Music Experience wavusa abe bethathe isihlwathi
Image: Sibonelo Ngcobo/Independent Newspapers