Kumenyezelwe abaqokwe kumaRadio Awards
UMROZA Buthelezi oqokwe emuxeni womsakazi ovelele ezinhlelweni zasekuseni kumaRadio Awards
Image: Instagram
BAMENYEZELIWE abazodlana imilala kumaRadio Awards azoba seSandton Convention Centre, eGoli, ngoDisemba 6.
Lo mcimbi waminyaka yonke uklomelisa abasebenza emisakazweni kusuka kubasakazi kuya kubethuli besimo semigwaqo nabadidiyeli.
Imiklomelo, ezobe igubha iminyaka engu-15 ikhona, imingenelo yayo ivulwe ngoJuni 4 yaze yavalwa ngo-Agasti 14.
UKhozi FM, olwanqoba umklomelo weMyStation - My Vote, luphinde lwaqokwa amahlandla ehlukene ngezinhlelo zalo.
Phakathi kweminxa eliqokwe kuyo kubalwa oweBest Breakfast Show: PBS ngohlelo iVuka Afika Breakfast Show.
Umethuli walo uNonhlanhla "Mroza" Buthelezi uphinde waqokwa emunxeni weBreakfast Show Presenter.
Emunxeni weMusic Show kuqhathwe izinhlelo zalo ezimbili iSigiya Ngengoma neKhozi FM Top 20. Kweminye iminxa ngoweSports Show ngohlelo wePrimeTime Sport, owePromotion Stunt-Event nge-Ukhozi FM Music Indaba noweCommunity Project Ukhozi FM Back to School.
IGagasi FM lona liqokwe eminxeni emibili weSports Show nge-Extra Time noweContent Producer lapho kuqokwe khona uSiphelele Nzuza odidiyela Indaba.
IVuma FM yona ivela eminxeni weDaytime Show ngohlelo iCrush YoLova.
Eziteshini zomphakathi iKwaZulu-Natal imelwe yiRadio Khwezi neNanda FM.
IRadio Khwezi iqokwe kathathu emunxeni weDrama Programme nge-Akusheshe Lapho, Inkomo Idla Iyemba ne-Ekugcineni.
Iqokwe nakwiNews and Actuality Show ngohlelo iSakha Isizwe with Saziso Dlamini nolwenziwa uLindani Zaca.
Iqhathwe neNanda FM nge-Isizwe Nezalo. INanda FM iphinde yaqokwa kwiDay Time Show ngohlelo iThe Lunch Time Fix.