Uboshelwe ukuzama ukubulala uShebeshxt

Umrepha waseLimpopo uShebeshxt ukhalelwe amasongo kaSigonyela ngoLwesithathu ekuseni ngamacala okuzama ukubulala okuthiwa enzeka ngo-Okthoba.

Okhulumela amaphoyisa eLimpopo, uColonel Malesela Ledwaba, esitatimendeni uthe babophe umculi odumile oneminyaka engu-30 endaweni yomtakabani eBendor ngo-9.30 ekuseni.

Uthe ukuboshwa kwakhe kwenziwe yithimba leProvincial Investigation Unit neleProvincial Tracking Team emuva kokukhishwa kwencwadi ekugunyazayo ngamacala amabili okuzama ukubulala avulwa eWesternburg.

"Ukuboshwa kwakhe kusukela esigamekweni esenzeka ezintatha ngeSonto, ngo-Okthoba 19 emgwaqeni uWitklip eLadanna ngaphandle kwaseLimpopo. Kusolwa ukuthi umsolwa waxakazisana nomunye umshayeli wase edubula kaningi kwenye imoto kwalimala kanzima umgibeli oneminyaka engu-34 owaphuthunyiswa esibhedlela esiseduze."

Uthe abaphenyi bathole incwadi egunyaza ukuboshwa kwakhe ngoLwesibili. Amaphoyisa athathe nezimoto zikamsolwa ukuthi ziyohlolwa.

Umkhuzi wamaphoyisa eLimpopo uLieutenant General Thembi Hadebe uncome amaphoyisa ngokusebenza.

"Lolu daba siluthathela phezulu futhi kuqokwe ithimbaa elizokwenza isiqiniseko sokuthi liphenya konke. Amaphoyisa ayagcizelela ukuthi akekho ongaphezu komthetho ngisho ngabe ungubani," kusho uHadede.

Umsolwa uzovela eNkantolo yeMantshi ePolokwane ngoLwesine ngamacala okuzama ukubulala.Uboshwa nje, ezinkundleni zokuxhumana abantu bebesababaza uxhaxha lwemicimbi aqashwe kuyo.