Izoqhubeka ngekhonsathi yomculo kuphela iDrakensberg Extravaganza yanonyaka
UMAWHOO uzonandisa kwiDrakensberg Extravaganza Music Experience eWoodstock Dam Picnic site, eBergville, ngoDisemba 6
Image: FACEBOOK
BAKUTHATHA njengesifundo abahleli beDrakensberg Extravaganza eba seBergville minyaka yonke ukuhoxisa uchungechunge lwemicimbi yabo yanonyaka bashiye ikhonsathi yomculo kuphela.
IDrakensberg Extravaganza, eqale ngo-2017, yenzeka izinsuku ezingaphezu kweziyisikhobisa eBergville.
Ihlanganisa izingqungquthela zokucobelelana ngolwazi emikhakheni eyahlukene, umjaho iDrakensberg Marathon, umncintiswano wokudoba, ie-jazz, ukuqwala izintaba nekhonsathi yomculo.
Nonyaka konke ngeke kwenzeke ngaphandle kwekhonsathi iDrakensberg Extravaganza Music Experience ezoba seWoodstock Dam ngoDisemba 6.
USipho Ndaba ohola ithimba labahleli uthe bathathe isinqumo esinzima sokuhoxisa imicimbi yabo eminingi nomjaho wabagijimi ngenxa yokuntula abaxhasi.
“Ukungabi nentshisekelo kwabaxhasi ekufakeni isandla emicimbini yemidlalo eheha izivakashi emakhaya kwenza kube nzima ukusingatha emikhulu njengeDrakensberg Extravaganza. Siyazifaka izicelo zoxhaso kodwa izimpendulo zingabuyi. Ngonyaka odlule sathenjiswa kodwa sachithwa ngemizuzu yokugcina,” kusho uSipho.
Uthe lokhu bakuthatha njengesifundo futhi bayathembisa ukuthi bazobuya ngonyaka ozayo umcimbi ube sesigabeni obukuso phambilini.
“Kumele sizame ukuqongelela kusuka unyaka uqala kunoma iyiphi imali esiyitholayo ukuze umcimbi wenzeke njengokwenhloso nangombono esasinawo ngesikhathi siwuqala ukuthi kumele ube yizinsuku ezingu-11 futhi uhlanganise okuningi okuhlomulisa umphakathi. Abaxhasi bagxila emadolobheni kodwa sizolokhu siqhubeka nokufaka izicelo asililahlile ithemba,” kusho yena.
Uqhube wathi: “Siyaxolisa kakhulu kubo bonke abaphazamisekile ngokuhoxisa kwethu ikakhulukazi nabagijimi ngoba besingafisi ukuhlela umjaho ongeke ube sezingeni kwazise sizama ukuheha nezinsephe zabagijimi. Asifuni ukubulala igama. Umjaho wethu ukwekhokha kahle esifundazweni ngoba siyafisa ukuthuthukisa abagijimi bethu.”
Uthe bakhethe ukuqhubeka nekhonsathi yomculo ngoba izokwazi ukuthuthukisa umnotho endaweni futhi idale amathuba emisebenzi.
Ubale ukuthi kuzoba khona uMawhoo, Nkeshemba, Nkosazana Daughter, Goldmax noNobuhle kwabazobe benandisa.
“Abanye sizolokhu sibamemezela ngokuhamba kwesikhathi asiqedile. Amathikithi asekhona eTicketpro naseSpar ngo-R150 kanti esangweni azoba wu-R200. I-VIP ingu-R600 kuthi i-coolerbox ingene ngo-R50,” kuphetha uSipho.