Kuzobhungwa ngendawo yokusingatha umcimbi Amatshiwelele Festival

UMHLELI womcimbi Amatshiwelele Festival obuseCurries Fountain, eThekwini, ngoMgqibelo uveza ukuthi usacubungula ngendawo azowenzela kuwo ngonyaka ozayo ngenxa yokugcwala.

Lo mcimbi obekungokokuqala ukhona, udonse izinkumbi zabantu ezifike ekuseni laze layoshona njengoba uphele ngo-10 ebusuku.

Uqale ngezintombi nto ebezihamba zibheke enkundleni ziphethe izingqwembe ebezinemiyalezo ehlukene.

Phakathi kwemiyalezo kukhona ebigqugquzela ukuhlolwa kwazo, ukukhuza isihlava sokuhlukunyezwa kwabesifazazne nezingane, ukusetshenziswa ngokweqile kwezidakamizwa, utshwala nokunye.

Enkundleni kube sekunandisa abaculi abehlukene abebeshiyelana inkundla.

Phakathi kwabo kubalwa uJumbo onyakazise inkundla ecula nezingoma zabanye, umculi kamaskandi uLimit Nala obehamba noKing Nuba, Babes Wodumo ocule neBig NUZ, DJ Mngadi, Sjerere, Boonu, Kotin, Q Twins, Mayoghurt, Ntencane, Gatsheni, Thokozani Langa Mthandeni SK nabanye.

Umhleli uLindani "Papa G" Gumede, uthe yonke into ihambe njengoba bebefisa.

“Akukho tshitshi okuthiwa lidukile noma lilahlekile. Seneme. Singakuveza ukuthi kuzoba wumcimbi waminyaka yonke futhi usuku lwangonyaka ozayo kuzoba wuMeyi 23. Indawo ivele yaba ncane kakhulu, indlela okugcwale ngayo ngakho sisazobuka ukuthi ngonyaka ozayo sizomisa kanjani,” kusho uPapa G.

Uthe inhloso bewukugqugquzela ukuziphatha kwamatshitshi futhi bawalethele nobumnandi.

“Ubuzowathuthukisa futhi ngakwezamabhizinisi ngoba besithatha izinkampani zamatshitshi sisebenza nazo.”