Ubumtoti obungefaniswe ebholeni buthakwa ngabalandeli
ABALANDELI: EMHLABENI ubumtoti bomdlalo webhola buhle ngabalandeli abasuke bethe shaye enkundleni befake imifaniswano yamaqembu abo.
Image: Itumeleng English/Independent Newspapers
EMHLABENI ubumtoti bomdlalo webhola buhle ngabalandeli abasuke bethe shaye enkundleni befake imifaniswano yamaqembu abo.
Lokhu kwenza ukuthi nongakaze alibhade enkundleni akulangazelele ngomdlandla ukuyozibonela mathupha zidudulana.
Abalandeli benza umsebenzi omkhulu wokukhomoza amaqembu abo ukuthi enze into yamehlo ukuze bangaphenduki inhlekisa ezimbangini zabo.
Nakule sizini esongwayo yeBetway Premiership sibabonile bedela amakhaza nokushisa kwelanga beyothamela imidlalo uma kudlala amaqembu abo.
Yize amanye amaqembu abegijima kule ligi, ikakhulukazi iKaizer Chiefs, ingenzanga ngokwezifiso zabalandeli emidlalweni yeligi kodwa sithemba ukuthi ngeke baphele umoya, nangesizini ezayo bazoqhubeka nokuwaseka.
Ngaphandle kokuchwaza kwenkundla ngeke kuze kubemnandi kubadlali bebhola. Yikhona okubagqugquzela ukuthi badlale ingcwenga yebhola ethela izithelo zokuthi kutholakale abaxhasi, kwande nabalandela iligi
Ngakho-ke kubalulekile ukuthi sibabonge abalandeli abahlale beyothamela imidlalo yePremiership neyeMotsepe Foundation.
Siyababonga kakhulu abalandeli baseBloemfontein naseLimpopo ngendlela abebephuma ngayo beyokweseka amaqembu abo.
Sithemba ukuthi abalandeli baKwaZulu-Natal bazokwembula ikhasi elisha ngesizini ezayo, baphume ngobuningi bayokweseka AmaZulu, Arrows neRichards Bay. Bangagcini ngokuthi kuphume nesinedolo uma kudlala abakhaya baseSoweto.
Ngeke sikhohlwe abeMamelodi Sundowns. Sikholwa wukuthi abalandeli baseMzansi bazoqhubeka baziphathe kahle ngokuthi beseke iligi. Sibonga ngisho abayiseka behlezi besemakhaya ngoba lokho kungaphemba uthando nasentsheni ukuthi ikhule izibandakanya nalo mdlalo.
Ezindaweni zokucisha ukoma kuthumela umyalezo omuhle ngobaluleka komdlalo webhola osushintshe impilo yabadlali abaningi. Nabagembulayo sithi baqhubeke nangesizini ezayo bangapheli amandla, unobhutshuzwayo yifa labamnyama eMzansi.