Bazobungazwa ngedili lomculo abaqokwe kumaBET Awards

BAZOVALELISWA ngedili lomculo abaculi baseNingizimu Afrika abazomela izwe kumaBET Awards aseLos Angeles (LA) ngoJuni 9.

UMaglera Doe Boy, TxC noDlala Thukzin baqokwe emunxeni weBest New International Act. Baqhathwe no-Abigail Chams (Tanzania), Ajuliacosta (Brazil), Amabbi (Brazil), ⁠Dr Yaro (France), Kwn (United Kingdom), Merveille (France), Odeal (United Kingdom) noShallipopi (Nigeria).

Emunxeni weBest International Act, uTyla uqhathwe noDJ waseSwatini kodwa ogqame kuleli u-Uncle Waffles, Any Gabrielly (Brazil), Ayra Starr (Nigeria), Bashy (United Kingdom), Black Sherif (Ghana), Ezra Collective (United Kingdom), Joé Dwèt Filé (France), Mc Luanna (Brazil), Rema (Nigeria) noSdm (France).

Kuhlelwe idili lomculo endaweni yobumnandi iThe Villa Waterfront,  eThekwini kusuka ngo-7 ebusuku ngomhla ka28 Meyi. Umcimbi uhlelwe ngokubambisana neDurban Tourism. Olandelayo uzoba ngoMeyi 29 eLIV Sandton eGoli.

Isikhulu seBET International, uMonde Twala, sithe ubudlelwano neDurban Tourism bubavumela ukuthi bakwazi ukuhlonipha nokugqamisa ithalente lakuleli.

"Amaphathi eBET Awards azogqamisa ukwenza kahle kwezobuciko, kweTheku kanjalo neNingizimu Afrika jikelele," kusho uTwala.

Imenenja kaMasipala weTheku, uMnuz Musa Mbhele, ithe le micimbi iyithuba elikahle lokuthi abalandeli bahlangane namaciko abawathandayo.

Ezinkundleni zokuxhumana kunomncintiswano wokuthi ababili bawine uhambo olukhokhelwe oluya eThekwini. Uhambo lwabo luzoqoshwa ludlalwe kwiBET Africa kulo nyaka.

AmaBET Awards azosakazwa bukhoma kwiBET Africa (DStv channel 129) ngo-2 entathakusa ngoJuni 9.