Amaciko ahambise uhla lwezikhalo ehhovisi likamengameli

Amaciko agcwale imigwaqo yasenhlokodolobha yezwe ePitoli ngenhloso yokuhambisa uhla lwezikhalo ngezinto angeneme ngazo eziNdlini zoMbuso nasehhovisi loMnyango wezobuCiko namaSiko kuzwelonke.

Le mashi osekunesikhathi yamenyezelwa iqale eziNdlini zoMbuso ngaphambi kokudlulela emahhovisi omnyango.

Ibihlelwe yiSouth African Artists Community (SAAC), okuvela ukuthi ihlanganise izinhlangano ezahlukene.

Phakathi kwazo kubalwa i-Cultural and Creative Industries Federation of South Africa (Ccifsa), South African Creative Practitioners Union, South African Music Industry Council, South African Arts & Culture Youth Forum, South African Poets Guild, South African Association of Arts Administrators, Cultural and Creatives Industries Guild of Africa, The Clap and Tap Federation ne-Association For the Entertainers of South Africa.

Elinye la maciko ebeliyingxenye yayo uZola Hashatsi kaMotsiri, lithe incwadi yezikhalo ihanjiswe ngempumelelo eziNdlini zoMbuso base bedlulela emahhovisi omnyango.

Phakathi kwezinto abakhala ngazo kubalwa uxhaso lweMzansi Golden Economy, nemiphumela yabafake izicelo, ukuqashwa kwezikhulu ezingenawo amava kwezobuciko, ukuqashwa ngokwenzelela amalungu ebhodi ezikhungo ezingaphansi komnyango, nokunye.

“Zikhona nezinye izinkinga ezihanjiswe ehhovisi likamengameli eziNdlini zoMbuso ekuseni. Amaciko abemi ngaphandle elindile ozokwamukela izikhalazo, kanti ihhovisi likamengameli lisheshile ngokuletha umuntu ozosayina uhla lwezikhalo,” kusho uZola ekhasini lakhe le-X.

Uthe amahhovisi omnyango avalwe ngamaphoyisa ami kuzo zonke izintuba zokungena. Uqhube wathi benze isimo sashuba ngokuletha owezemidlalo ukuthi azokhuluma namaciko.

“Kuthiwa ungqongqoshe akekho esifundazweni unomhlangano yize kuthenjiswe ukuthi uzoba khona amashe namaciko,” kusho yena.

Ngenyanga edlule ngesikhathi kubikwa ngemashi, uNgqongqoshe wezemiDlalo, ubuCiko namaSiko uGayton McKenzie wabhala ku-X ukuthi kumele bafike nobufakazi bokuthi bayisebenzise kanjani imali abebeyithola unyaka nonyaka.

"Ningamasha ka-5 million kodwa ngeke nisathola ngisho isenti. Uphelile uKhisimusi!" kusho uMcKenzie, oqhube wabhala ekhasini lakhe kwi-X ukuthi bamatasa bashintsha imboni.

Uthe abantu bakhokhelwe izigidi ngoba beqamba amanga ngokuthi bathuthukisa amaciko.

"Engikucela kubo ukuthi baveze ukuthi imali isebenze kanjani, bona baphendula ngesiteleka. ICcifsa neWorkforce Healthcare (Pty) LTD ngeke bathole ngisho nesenti kuze kuba ngibona ubufakazi bomsebenzi owenziwe," kusho yena.

Uthe umnyango ukhiphe uR5 million kwiCcifsa unyaka nonyaka kulandela isivumelwano sayo nomnyango ngo-2015/2016.

Uthe le mali ayiwufaki uR11.5 million okwathiwa ngeyemiklomelo, Usiba Awards ngo-2018/19.

Uveze ukuthi kusuka ngonyaka wemali ka-2015/2016 kuya kunyaka wemali ka-2023/2024, iCcifsa inikwe uR27.5 million.