UPhindi Grootboom uqashwe njengesikhulu esisha eSABC eKZN
UPhindile Grootboom oseqokwe njengesikhulu kwaSABC KwaZulu-Natal
Image: Facebook
INHLANGANO yezokusakaza iSABC ayigcinanga ngokuvala isikhala ebesikhona emsakazweni Ukhozi FM njengoba kuqala uMeyi kepha nesesikhulu esengamele ukusebenza kulesi sifundazwe.
I-SABC iqashe uLwazi Mthabela njengomphathi omusha woKhozi kulandela ukushiya kukaSbongi Ngcobo ngasekupheleni konyaka odlule.
Khona ekupheleni konyaka odlule uSimphiwe Ngcobo, obengamele ukusebenza (Regional Operations Manager) kweSABC KwaZulu-Natal, ubegcina kulesi sikhundla.
Ekuqaleni konyaka uthathe isikhundla sokuphatha bonke abengamele izifundazwe eSABC jikelele eqokwa njengeHead: Regions, Strategy & Governance.
Isikhala sakhe KwaZulu-Natal sesivalwe nguPhindile Grootboom, onamava okusebenza ezindaweni ezahlukene.
UPhindile ugabe ngeziqu zeBachelor of Commerce azithola eNyuvesi yaKwaZulu-Natal.
Uke wasebenza e-East Coast Radio njengeDirect Sales Manager nakwiVuma FM njengeHead of Sales ukukha phezulu.
Uzakhele udumo nangemisebenzi eyahlukene ayenza nomyeni wakhe uMonwabisi Grootboom, ehlanganisa ukubhala izincwadi, izinhlelo zethelevishini nokunye.
Ethintwa izolo uthe kukhona asafuna ukukubuza ehhovisi lakwandabazabantu kuqala ngaphambi kokuthi aphendule.
Kushaye isikhathi sokushicilela engaphendulanga.
Ekhasini lakhe leLinkedin, usebhalile ukuthi uyisikhulu sokusebenza eSABC KwaZulu-Natal kusuka ekuqaleni kwenyanga.