Kugcwale phama behlukanisa unyaka ngomculo nomkhuleko
UREBECCA Malope enandisa kwiMayine Crossover Gospel Experience Isithombe: SITHUNYELWE
KUQOPHEKE umlando endimeni yezomculo e-ICC, eThekwini, ngoLwesibili ebusuku, kubuthana amakholwa, abaholi bamahlelo ehlukene, ikakhulu awenkolo yobuKristu, kwasha idili lomculo wokholo, obelihambisana nomkhuleko kwiMayine Crossover Gospel Experience.
Lo mcimbi, onhloso yawo wukuhlukanisa unyaka ngomculo wokholo futhi obekugcwele phama kuwona njengoba amathikithi edayise wonke aphela, uvulwe ngomkhuleko wuMfundisi Mbabazi Ngcobo webandla i-UCCSA.
Nakuba umcimbi ungaqalanga ngesikhathi obekulindeleke ngaso u-6 ntambama, ngenxa yokungagcini isikhathi kwabantu, kodwa uqale ngegiya eliphezulu, inkundla ivulwa yisilomo somculi wokholo uDumi Mkokstad.
Mhla kwethulwa umcimbi kwabezindaba, abahleli bawo baveza ukuthi babezokwenza inhlolokhono yekhwaya ezonandisa ngelanga lomcimbi. Kube njalo ngempela sekungena iMayine Choir, eqhulule inqwaba yamaculo eZayoni, cishe ihora lonke - ithakaselwa.
Omunye wamalungu ekhwaya uDumisani Manukuza waKwaMhlabuyalingana, uthe ukholwa wukuthi leli thuba abalitholile lizosiza okungenani ingxenye yabo ukuvula iminyango kwezomculo.
“Kukhulu kakhulu kimina lokhu ikakhulu ngoba kade ngangizama ukuchuma kwezomculo, ngicula ngemuva kubaculi engingabala kubona uThinah Zungu noSipho Ngwenya, ngakho ukuba khona kwingqophamlando enjena kunginika ithemba,” usho kanje.
Inkundla ishukume kakhulu futhi sekungena izinkakha zomculo wokholo oHlengiwe Mhlaba noRebecca Malope oshaye ingoma waze wehla e-stage, wacula phansi nabalandeli bakhe, beviliyela, waze wayophuma ngomnyango eseqeda ukucula.
Umnikazi womcimbi uSibongiseni “Mageza” Mbambo ubhulelwe amazolo wumsakazi woKhozi FM, uPhindiP, owenze ezibukwayo ngamaculo okudumisa.
Sekusele imizuzu emihlanu ngaphambi kokuthi kuhlukane unyaka, kungene uMageza, wabonga bonke ababe nesandla ukuthi umbono wakhe ube yimpumelelo, wase ekhuleka kungenwa ku-2025.
Unyaka uhlukaniswe ngowayengumsakazi woKhozi FM, uLinda Sibiya, yasho inhlokomo, abantu bejabulela unyaka omusha. Emva kwalapho kungene enye futhi inkakha yezomculo, uBenjamini Dube, kwaqhubeka indumiso.