Kuchithwa imibiko ngokufa kwesilomo sikasomahlaya
UMakaThangithini okuwumlingiswa odlalwa nguSimthande Myeza Isithombe: Facebook
Imenenja yesilomo sikasomahlaya uSimthande “MakaThangithini” Myeza ayithi vu ngokwehlele lo somahlaya ngaphandle kokuthi unakekelwa ngokusezingeni eliphezulu.
Lokhu kuza ngemuva kokusabalala kwemibiko ezinkundleni zokuxhumana zokuthi akasekho emhlabeni.
“Siyibonile imibiko yokuthi usomahlaya, umsakazi nomlingisi uSimthande Myeza akasekho emhlabeni. Le mibiko ayilona iqiniso, iyadukisa futhi ibuhlungu emndenini kaMyeza nakubalandeli,” kusho uPhila Dubazane, esitatimendeni esinamekwe ekhasini likaSimthande.
Uthe uSimthande uyanakekelwa ngemuva kwesigameko abangeke basidalule kuze kuba kuhlangana umndeni.
“Njengamanje sinxusa abantu ukuthi bayeke ukuqagela ngoba lolu wudaba olubucayi.”
Unxuse abalandeli ukuthi bamthandazele nomndeni wakhe, wathi eminye imininingwane izodalulwa emakhasini akhe.
USimthande uzakhele udumo ngamavideo akhe amahlaya awafaka kuYoutube nakwezinye izinkundla zokuxhumana lapho edlala khona umlingiswa uMakaThangithini.
Uphinde abe ngusomahlaya onandisa emicimbini yamahlaya.