Indawo yokudla yakuleli ihlabane ngendondo yekhethelo phesheya
UMA useGoli uhalela ukudla okumnandi, indawo enhle, epholile nekulethela umculo bukhoma, vakashela i-11th Floor eBedfordview.
Le ndawo yokudlela isithathe iNingizimu Afrika yayibeka ebalazweni njengoba ikhale yemuka nendondo yekhethelo kwiWorld Culinary Awards emcimbini obubanjelwe e-Atlantis The Royal eDubai, e-United Arab Emirates, ngo-Okthoba16, 2023.
Le ndawo yokudlela ithathe indondo yeBest Rooftop Restuarant.
Okwenza le ndawo ibe ngeyekhethelo wukuthi iheha izivakashi ngobuhle bayo bemihlobiso enhle yesimanje, impatho yekhethelo lapho abasizi beqinisekisa ukuthi izivakashi zithola ukunakekelwa, ukudla okumnandi kanjalo nokunandisa kwabaculi abahlukene bukhoma.
Umpheki wakule ndawo, uKyle Marshall, kunguyena owenza ukudla okumnandi ngobuhlakani nobuciko bokupheka, nokwenza izidlo ezibonisa ukunambitheka okucebile.
Ngokwesitatimende sakhe uMarshall uthe: “Umsebenzi wethu ukuthatha izivakashi sizibeke komunye umhlaba ohlukile ngokuzinika okukhethekile kwisidlo ngasinye. Sihlose ukwakha indawo lapho isidlo ngasinye siwumsebenzi wobuciko nokuxoxa indaba ethokozisayo.”
Uthi lokhu bakwenza nangeziphuzo zabo ezihambisana nokudla okuhlukene nokuyiziphuzo zakuleli nezaphesheya.
Uthi nalabo abathanda iziphuzo ezingama-cocktail abasali ngaphandle njengoba bayakwazi ukubahlanganisela iziphuzo ezimnandi ezinomlando omdala kanjalo nezesimanje.