ULunga Tshabalala kwabazobonakala kuMiss World South Africa
ULUNGA Tshabalala ngomunye wosaziwayo abazobonakala bephethe uhlelo emcimbini kaMiss World South Africa, ozoba ngenyanga ezayo ePitoli Isithombe: SITHUNYELWE
UBONGA uCarol Bouwer ngethuba alitholile lokuba ngomunye wosaziwayo abazobonakala bekhuluma nosaziwayo nezicukuthwane esemcimbini kaMiss World South Africa, uLunga Tshabalala.
Inkampani kaCarol, iCarol Bouwer Productions (CBP) ithole imvume yokwenza lo mcimbi kuleli. U-Carol owaziwa kwezokwethula izinhlelo, ezokulingisa nasemkhakheni wezindaba, ungusomabhizinisi ohamba phambili.
Uthole inkontileka yokuhlela umcimbi kaMiss World South Africa ngenyanga edlule.
ULunga nguye ozobe ekhuluma nezimenywa kukhaphethi obomvu nezihambeli ezizobe zisemcimbini ngo-Okthoba 28, eState Theatre, ePitoli.
UMinnie Dlamini ngesonto eledlule umemezele ukuthi nguye ozophatha uhlelo emcimbini, okuyithuba athe liyingqayizivele.
Ekhuluma neSolezwe uLunga, uthe okumjabulisa kakhulu wukuthi umcimbi usukhona kuleli, okuyinto enhle kwabesifazane abafuna ukugqamisa amakhono abo emazweni omhlaba.
“UCarol kumele simbongele ukuthi uveze nethuba elifana naleli kwabesifazane abafuna ukuya kude emkhakheni kazime. Ngiyathemba ukuthi lo mcimbi ngeke nje ugcine kulo nyaka kuphela kodwa uzoqhubeka ukuya phambili.
Sengibalindele ngabomvu osaziwayo abazohambela umcimbi nesizokhuluma nabo ngezinto eziningi ezithinta umkhakha wokumodela,” kusho uLunga.
Uthe okunye abheke ukukubona, yizimenywa eziqhamuka emazweni omhlaba ezizoba semcimbini. Emajajini kubalwa uRolene Strauss, Sithembile Ntombela noDaniel Asiwe.
Intokazi eyodla umhlanganiso, izoqhudelana nezinye ezingu-130 zakwamanye amazwe emcimbini ka-71, ozoba ngoDisemba.
Isicoco salo nyaka siphethwe yintokazi yasePoland, uKarolina Bielawska.