Kumi ngomumo ngeHollywoodbets Durban July

Sizwe Blose|Published 2 years ago

U-DJ Sjerere uzobe enandisa kwamanye amatende eHollywoodbets Durban July, uthathwe lapha nabakhangisi bengqephu, e-Oceans Mall Isithombe: Sizwe Blose

INGQEPHU ibidida unwabu emcimbini wemfashini owandulela umjaho omkhulukazi wamahhashi kuleli, iHollywood Bets Durban July, obuse Oceans Mall, eMhlanga, namhlanje.

Lo mcimbi ubuhanjelwe abezindaba, osomabhizinisi nezikhulu zikaMasipala weTheku.

INJABULO izobe ibhalwe ebusweni kwabazohambela iHollywoodbets Durban July njengoba ibonakala kulaba bakhangisi bengqephu akade besemcimbini wayo eMhlanga Isithombe: Sizwe Blose

Likhuluma kulo mcimbi, iKhansela uPhilisiwe Ndlovu eliyiphini likasihlalo wekomiti lezokuThuthukiswa koMnotho kuMasipala weTheku, lithe konke kumi ngomumo ngalo mcimbi osusalelwe yizinsuku eziyishumi njengoba uzoba ngoJulayi 1, eGreyville Racecource, eThekwini.

ABAKHANGISI bengqephu bekhombisa ngeminye yemisiko ehambisana nendikimba yeHollywoodbets Durban July Isithombe: Sizwe Blose

“Silindele abantu abawu-35 000 kuya ku-48 000 abazohambela lo mcimbi. Sinethemba lokuqashwa kwamahhotela, izindawo zokudlela okuzongenisa imali emnothweni weTheku. Ezokuphepha zizobe ziqinile, abantu abafike bazojabula eThekwini,” kusho uNdlovu.

BAZOBE bebahle kanjena abakhangisi bengqephu kwiHollywoodbets Durban July, lapha bebese-Oceans Mall, eMhlanga Isithombe: Sizwe Blose

Lo mcimbi uzakhele udumo ngengqephu ubumnandi nomjaho wamahhashi, kusuke kukhona nosopolitiki bawo wonke amazinga.

Amaphanta athola ithuba lokungenisa imali ngokudlala amahhashi.

Kulindelwe nabantu ukuthi bafike begqoke ngendlela ehambisana nendikimba yalo nyaka ethi “Out of this World”.