Ufaniswe neqhawe owakuleli obesohlelweni lwamakhono
UMUSA Motha waseJohannesburg obengenele uhlelo lwamakhono iBritain Got Talent noshayelwe izandla ngokufika esigabeni sokugcina salolu hlelo Izthombe: TWITTER
UMDANSI wakuleli obengenele uhlelo lwamakhono lwaphesheya kwezilwandle, iBritain Got Talent, eLondon uMusa Motha, uthi konke kuyenzeka uma nje ukholwa.
UMusa owanqunywa umlenze ngenxa yokuphathwa yisifo somdlavuza esemncane, ukhishwe esigabeni sokugcina njengoba lolu hlelo luwinwe usomahlaya waseNorway, uViggo Venn.
Le nsizwa yaseSebokeng, eJohannesburg, iqale ukugqama ezinkundleni zokuxhumana ngesonto eledlule idlulela esigabeni sokugcina salolu hlelo.
Kwi-video eyasabalala ezinkudleni zokuxhumana uMusa washiya amajaji nezihlwele zibambe ongezansi, zingakholwa yimidanso ayenze esiteji, ngomlenze owodwa.
Kule sizini yalo nyaka uyena yedwa othole ithuba lokuqhubekela esigabeni sokugcina njengoba ashayelwa insimbi okuthiwa yiGoldeni Buzzer, ekubeka esigabeni sokugcina sohlelo.
Ekhuluma ngothando lwakhe lokuba ngumdansi, uMusa uveze ukuthi wayefuna ukuba wumdlali webhola ohamba phambili kodwa isimo abhekana naso samholela ekutheni ashintshe abheke omunye umkhakha.
“Kula ngabheka khona emikhakheni ehlukene, ngagcina ngifikelwa wuthando lokuba umdansi nomculi. Ngafunda ukudansa ngomlenze owodwa kwaze kwaba la ngibona khona ukuthi sengikulungele ukuveza ikhono lami,” kusho uMusa.
Uthe ubonga wonke umuntu ngokumnika uxhaso aze afike lapho efinyelele khona kulolu hlelo.
Izwekazi lase-Afrika belingamelwe uMusa kuphela njengoba neqembu lase-Uganda iTriplets Ghetto Kids nalo lifinyelele kulesi sigaba.
Iningi labantu bakuleli bahalalisele uMusa ngokufinyelela kulesi sigaba, njengoba bethe kubantu bakuleli ufana nonqobile.
USomizi uthe “Kithi ungumqobi”.
UTTMBHA uthe “Siyaziqhenya ngawe, uyiqhawe lethu”.