Isizohlale iseThekwini ngePhasika iJoyous
UHlengiwe Mhlaba ungomunye wabebezoseka iMTN Joyous Celebration eThekwini ngeSonto Isithombe: FACEBOOK
UMSUNGULI weMTN Joyous Celebration, uLindelani Mkhize, uthi sebezohlala beseThekwini njalo ngePhasika ngemuva kwempumelelo yomcimbi wabo wokuqala iJoyous Easter Mega Fest, obuse-Inkosi Albert Luthuli International Convention Centre (ICC) ngempelasonto.
Umcimbi uqale ngoLwesihlanu waze waphothulwa ngeSonto. Uvulwe ngokwethulwa kwe-albhamu entsha yeqembu iJoyous Celebration 27: Hope (Live at the Emperors Palace, 2023) obekungokokuqala ukuthi yethulwe eThekwini.
NgoMgqibelo kulandele umcimbi iGospel Meets Soul & Jazz Super Club. Isongwe ngeMTN Joyous Celebration & Friends.
ULindelani ophethe iqembu ngokubambisana noMthunzi Namba noJabu Hlongwane uthe “kuzalwe ingane entsha”.
“Kucacile ukuthi yinto ezoba njalo ngePhasika kuya phambili. Asisafuni ukuzula kakhulu njalo ngalesi sikhathi, sesizoba lapha eThekwini minyaka yonke.
“Sizobambisana ne-ICC njalo silande nezikhulumi zasemazweni ahlukene nabafundisi basekhaya. Bafikile ukuzoseseka ngakho ngonyaka ozayo sizoba nohlelo lwabo mhlawumbe oluzoqala emini.
“Ngingasho kugcwale umlomo ukuthi minyaka yonke sizoba lapha, yingakho ngithi kuzalwe ingane entsha,” kusho uLindelani.
Ubonge abantu bakuleli dolobha ngokubasingatha nokubeseka emcimbini yabo.
“Angikaze ngilubone uthando olungaka ngesikhathi sePhasika esimatasa. Yize kunjalo benze isiqiniseko sokuthi siba yingxenye yezinhlelo zabo abese benazo. I-albhamu iseyintsha kodwa bekungathi bazilungiselele nathi ngoba bebezicula nathi izingoma ngisho nalezi ebengithi zinzima,” kuchaza uLindelani.
Ubonge nabaculi okukhona kubo uHlengiwe Mhlaba, Malusi Mbokazi, Jumbo noDumi Mkokstad abafike bacula ngeSonto.
“Nabangasekho kwiJoyous kodwa abake baba yingxenye ngiyababonga. Abaculi baseThekwini ngiyabathanda ngoba abanamona bathe bayakweseka okwenziwayo.”
Uveze ukuthi baphothula izingxoxo nabaxhasi ukuze baqale umjikelezo ozohambela izindawo ezahlukene bethule i-albhamu entsha yeqembu.