UTerry noLerato emdlalweni kaShaka wase-USA
ULERATO Mvelase
ISIHLABANI somlingisi waseNingizimu Afrika, uTerry Pheto simenyezelwe njengomunye wabalingisi abajoyine umdlalo wase-USA, okhuluma ngempilo yeSilo uShaka, inkosi yamaZulu.
UTerry uzolingisa indawo kaJuma, owayengunkosikazi kaZwide okuyindawo edlalwa ngu-Adewale Akinnuoye- Agbaje, owaziwa ngamafilimu i-Oz, The Bourne Identity neGame of Thrones.
UTerry ubhale ezinkundleni zokuxhumana wathi uzizwa ehloniphekile ngokuthi anikezwe ithuba lokulingisa emdlalweni nabalingisi abahlonishwayo. Phakathi kwabanye abalingisi baseNingizimu Afrika, ababoshelwe kubalwa uThapelo Mokoena, Warren Masemola noThando Dlomo.
UTerry ubuyela ekulingiseni nje, ubesegxile ekusebenzeni ngemuva njengoba engumqondisi nophrojusa wamafilimu akhonjiswa kwiNetflix iSavage Beauty neThe Brave Ones.
Omunye umlingisi wakuleli owengezwe nguLerato Mvelase, naye udalule izindaba ezinkundleni zokuxhumana. ULerato uzolingisa indawo yeNkosazana uMkabayi kaJama, ongubabekazi weNgonyama Shaka kaSenzangakhona.
Ukuqokwa kwabalingisi bakuleli ukuyolingisa emdlalweni waphesheya kwezilwandle kushayelwe izandla ngabalandeli embonini yamafilimu.
Umlingisi waseSenegal, u-Aïssa Maïga uzodlala indawo kaNdlunkulu uNandi, ongunina kaShaka, nokunguyena owenza konke okusemandleni ukucentela indodana yakhe ukuthi igcine isithole ubukhosi.
Kuhlelwe ukuthi uqale ukuqoshwa kule nyanga ephezulu KwaZulu-Natal, kodwa uzoze uqale ukukhonjiswa ngonyaka ozayo.
Uzophrojuswa ngu-Antoine Fuqua, kanti ubhalwe ngu-Olu Odebunmi noTolu Awosika, kuthi indawo kaShaka ilingiswe nguCharles Babalola waseBritain.