U-Anele Mdoda emcimbini ophambili eHollywood

USEPHINDE wanyelwa yinyoni esandleni umethuli wezinhlelo obuye abe ngumsakazi, u-Anele Mdoda, ozobonakala ethula ired carpet emcimbini ophambili wezindondo zamafilimu, ama-91st Academy Awards (Oscars) nonyaka

.

U-Anele nesiteshi sethelevishini iM-Net bazothatha ababukeli bakuleli bababeke kulo mcimbi ozoba ngoFebruwari 24 eDolby Theatre eHollywood, Los Angeles. 

“Ngiwabuka minyaka yonke ama-Oscar, engawathanda kakhulu ingesikhathi uDenzel Washington noSandea Bullock bethola izindondo, nangesikhathi kunqoba uCharlize Theron owabonga iNingizimu Afrika,” kusho u-Anele ekhuluma ngalo mcimbi.

AMA-91st Academy Awards azoba ngoFebruwari 24 kanti ababukeli bakuleli bazothola ithuba lokubona abalingisi abaphambili emhlabeni bekhuluma no-Anele Mdoda kwired carpet. Isithombe: Danny Moloshok/Invision/AP, File

U-Anele uzolandela ezinyathelweni zomunye umethuli wezinhlelo wakuleli, uLalla Hirayama, naye oke wasingatha ired carpet yama-Oscar nyakenye.  

Uthe unesifiso sokuxoxa nomqondisi wefilimu i-A Star is Born, uBradley Cooper ngokunjalo noSpike Lee.

“Ngifuna nokuhlangana nabalingisi beBlack Panther, okuyifilimu eqokwe eminxeni eyisikhombisa kuma-Oscar. Ngiyafisa ukukhuluma noMahersgala Ali osethubeni lendondo ngefilimu iGreeen Book,” kusho u-Anele othe nakanjani imisiko yosuku nayo uzoyibheka.