Kugiye oweThe Queen kumaDStv Mzansi Awards

KUGIYE umlingisi weThe Queen emcimbini wamaDStv Mzansi Viewers Choice Awards akade eseSandton, eGoli ngoMgqibelo ebusuku.

UThembsie Matu olingisa indawo kaPetronella, ukhale wemuka nezindondo ezimbili okukhona kuzo eyomlingisi ohamba phambili nekasaziwayo othandwayo kuleli.

Ngonyaka odlule indondo efanayo yahamba noThembisa Mdoda owayethula uhlelo I-Our Perfect Wedding.

Kulo mcimbi bekuboshelwe njengoba emikhakheni eyahlukene bekuqhathwe osaziwayo abanamava.

Emkhakheni omunye obekuboshelwe kuwo kakhulu owomsakazi ovelele obekuqhathwe kuwo abasakazi okukhona kubo uDudu Khoza noSelby Mkhize boKhozi FM, indondo ikhale yemuka nenkakha yomsakazi uNtate Thuso Motaung.

Kulo nyaka uBonang ukhale wemuka nendondo kasaziwayo ohambe phambili kulo nyaka abeqhathwe kuwo nowake waba umngani wakhe uSomizi Mhlongo.

UKhuzani uphinde waqopha umlando njengoba ebe umaskandi wokuqala

ukuqokwa kulo mcimbi selokhu waqala, wakhala wemuka nendondo yomculi ohamba phambili kuleli.

IDistruction Boyz ikhale idle ubhedu ngendondo yeqembu elikhula ngesivinini.

IDISTRUCTION Boyz idle umhlanganiso ngendondo yeFavourite Rising Star emcimbini weDstv Mzansi Viewers’ Choice Awards Isithombe : SIGCINIWE

Emcimbini kuphinde kwahlonishwa uDkt Rebecca Malope ngegalelo lakhe emculweni.

Abanye abadle umhlanganiso emkhakheni weFavourite Song of the Year uPrince Kaybee, kwiFavorite TV Presenter uPearl Modiadie, kwiFavourite Comedian uSkhumba Hlophe, kwiFavourite Actor uWarren Masemola, kwiFavourite DJ uBlack Coffee, kwiFavourite Sports Personality uCaster Semenya nabanye.