Ezokungcebeleka

IBhova liqumbe phansi Indidane kokamaskandi

Charles Khuzwayo|Published

UMGQUMENI Khumalo ozohlonishwa kwiMpucuzeko Maskandi Festival ePeople’s Park, eThekwini UMGQUMENI Khumalo ozohlonishwa kwiMpucuzeko Maskandi Festival ePeople’s Park, eThekwini

SIKHALE ngaphansi isihlabani somculo kamaskandi, uMtshengiseni “Indidane” Gcwensa waMageza Amahle, emqhudelwaneni wezingwazi ezingasekho. Indidane ibiqhathwe noMgqumeni “Ibhova LikaDikadika” Khumalo, Khwelebhasini noMfazomnyama.

Abagqugquzeli beMpucuzeko Maskandi Festival ezoba sePeople’s Park (Moses Mabhida Stadium), eThekwini, ngoMgqibelo kusukela ngo-10 ekuseni, bebekhiphe uhlu lwabaculi okufanele bahlonishwe ngozakwabo abasaphila ngalolu suku.

Abantu bekufanele bavotele enye yezingoma ezimbili okufanele iculwe ngesinye isihlabani. Ezingomeni obekufanele uKhuzani Mpungose azicule bekukhona eyeThwasa Langempela (elinye igama leNdidane) ethi Shwi Nomtekhala nekaMgqumeni ethi Uthando Aluboni, kwaphumelela ekaMgqumeni ngamaphesenti awu-53 kwawu-47. UNyonemhlophe bekufanele acule ekaMfazomnyama ethi Ngisebenzile Mama noma yaMageza Amahle ethi Ngicela Ningishuthe kwaphumelela ekaMfazomnyama ngamaphesenti awu-70 kwawu-30. Amageza Amahle bekufanele acule eyeNdidane ethi Sishaya Kwasani noma ekaKhwelebhasini ethi Mina Ngistress, kwaphuma phambili ekaKhwelebhasini ngamaphesenti awu-64 kwawu-36.

INDIDANE

UShwi Nomtekhala bazokhumbula uSandile Mbongwa waMabongwa ngethi Uloliwe, uThokozani Langa uzokhumbula uBhekumuzi Luthuli ngethi Awungisize, uMthandeni “Igcokama Elisha” Manqele uzothulela isigqoko uMgqumeni ngethi Isitolo Sendoda, uKhangelani “DSD” Mhlongo woSaziwayo uzokhumbula uMgqumeni ngethi Isemlenzeni kuthi uJaiva Zimnike ahloniphe uMgqumeni ngethi Sakhala Kamnandi.

Umgqugquzeli womcimbi, uXolani Mcineka, uthe unqume ukuhlonipha abangasekho ngokuzwa uvo lwabalandeli balo mculo. Uthe abantu bebevotela ingoma ezinkundleni zokuxhumana nangama-e mail. Amathikithiki akuma-computicket ngoR100 nangoR500.