UKHOLWA ukuthi umdlali wasemuva uSibusiso Mabiliso unekhono lokuthuthukisa noma yiliphi iqembu umqeqeshi waMaZulu uBrandon Truter, futhi kusengenzeka abuyele kuleli qembu.
Lo mdlali oneminyaka engu-23 ubudala washiya Usuthu wajoyina iKaizer Chiefs ngaphambi kokuqala kwesizini edlule. Nokho uhlulekile ukulithola ijezi kuMakhosi, wabonakala emidlalweni eyisithupha kuphela ngesizini edlule.
Ngempelasonto iChiefs idalule ukuthi isinqume ukumdedela uMabiliso, ngemuva kokumemezela ukuthi isisayinise umdlali waseMozambique, u-Edmilson Dove.
"Ungumdlali osezingeni eliphezulu futhi ngicabanga ukuthi noma yimuphi umqeqeshi uyamdinga umdlali onjalo. Sinabadlali ababili abahle kwesokunxele, uMxolisi Kunene noRiaan Hanamub. Ukwengeza uMabiliso kungalikhuphula izinga kanye nokuncintisana phakathi kwalaba badlali abathathu,” kusho uTruter ebuzwa ngamathuba okusayinisa uMabiliso.
"Uma ubheka amaqembu anqoba izicoco njengeSundowns noma amaqembu amakhulu ase-Europe, aba nabadlali abangu-14 abadlala njalo bese enza izinguquko lapha nalapha. Uma unabadlali abaningi abaqinile kuba lula ukuvala izikhala uma kukhona olimalayo.
"UKunene noHanamub bayakwazi ukudlala emuva uma uvale ngabadlali abane, futhi bayakwazi ukwehla benyuka kwesokunxele uma kusetshenziswa uhlelo lwe-3-4-3. Sinabadlali abahle kakhulu abasebenzisa unyawo lwesokunxele kodwa singakwazi ukwengeza ngabanye. Uma kwenzeka kuzokwenzeka."
Ngempelasonto Usuthu lubuye selulandela ngemuva lwadla iCape Town City ngo 2-1 eMoses Mabhida Stadium. Besekungokwesibili ezikaTruter ziphaphanyiswa igoli njengoba kwenzeka ngesikhathi zidla iSuperSport United ngo 2-1 enkundleni efanayo ngesonto eledlule.
"Nakulokhu sibuye sesilandela ngemuva, akuyona into esihlele ukuyenza, kodwa futhi kukhombisa ukuthi iqembu liyakwazi ukulwa futhi likulambele ukunqoba imidlalo," kusho uTruter.
"Kumele sibheke indlela esizihlela ngayo emuva nokuthi siwangenisa kanjani amagoli. Yinto esizoyibhekisisa ngoba kuzokwenzeka sidlale namaqembu ahleleke kangcono kuneCity, singabe sisabuya emidlalweni."
Usuthu lulele endaweni yesibili kwi-log ngamaphuzu ayisikhombisa emidlalweni emithathu. Umdlalo olandelayo luzowudlala neSwallows eDobsonville Stadium, eGoli, ngoLwesihlanu.