OMUNYE wabagadli abaqavile emlandweni webhola laseMzansi, uShaun Bartlett, ukhombe amaholidi kaKhisimusi novalo lokuvula unyaka ngebatha kubaqeqeshi bamaqembu eBetway Premeirship njengembangela yesomiso samagoli emidlalweni yokuvula unyaka omusha.
Abalandeli bamaqembu ePremiership bawuqale kabi u-2025, kwazise emidlalweni yeligi yokuvula unyaka mathathu kuphela amaqembu ashaye amagoli.
UBartlett ongumqeqeshi ophinde abe umhlaziyi, utshele Isolezwe ukuthi uyayazi imbangela yalokhu futhi ayibathinti kangako abadlali.
AmaZulu FC, Lamontville Golden Arrows, TS Galaxy, Magesi FC, Marumo Gallants neRichards Bay FC, bonke bahlulekile ukushaya igoli kweyokuqala emithathu edlalwe ngokwahlukana ngoMgqibelo.
Kuze kwabangcono ngeSonto lapho iSekhukhune United ibambane khona nePolokwane City ngo 1-1 obekungamagoli okuqala onyaka omusha.
NgeSonto bekubhekwe iCape Town City neKaizer Chiefs ukuba benze okuhlukile kodwa nakubona kwafana kwazise amaCitizens agcine enqoba ngo 1-0 kuMakhosi.
“Kusazothatha isikhathi imidlalo ibanda ngale ndlela ngoba amaqembu amaningi anabaqeqeshi abasha abazimisele ngokwenza konke ukuvikela imisebenzi yabo,” kusho uBartlett.
“Abaqeqeshi bayabona ukuthi abanikazi bamaqembu abasananazi uma izinto zingahambi kahle ngakho-ke laba abasenawo umsebenzi balwela ukuwugcina.
“Mancane amathuba okukhala ngaphansi uma uvale emuva ngakho-ke abaqeqeshi abaningi bahamba ngaleyo ndlela. Umthelela walapho kuzoba wukugqoza kwamagoli njengoba kwenzekile emidlalweni yangempelasonto.
“Nezibiliboco zikaKhisimusi zinesandla kodwa ngokwami indaba ikubaqeqeshi iningi labo elisha emsebenzini kanti abanye basabanjisiwe,” kusho uBartlett.
UBartlett olele isibili ngokuhlohlwa kwamagoli amaningi emlandweni weBafana Bafana, unembe enxebeni ngesimo sabaqeqeshi abaningi kwiPSL kwazise iningi lamaqembu selivele libashintshile kule sizini.
Kuze kube yimanje kuseyi-Orlando Pirates, Stellenbosch FC, Polokwane City, Kaizer Chiefs, Sekhukhune United, Royal AM neSuperSport United kuphela amaqembu asaphekwa ngabaqeqeshi abaqale nawo isizini. UDan Malesela, obemisiwe kwiMarumo Gallants, usebuyisiwe.
Amaqembu amathathu kwamane aseKZN asebashintshile abaqeqeshi kwazise uMabhuti Khenyeza (Lamontville Golden Arrows), Brendon Truter (Richards Bay FC) noPablo Franco Martin (AmaZulu) bahlukene nawo.
Ngaphandle kwalaba baqeqeshi, uManqoba Mngqithi, Eric Tinkler, Sead Ramovic noClinton Larsen, abasekho emabhukwini eMamelodi Sundowns, Cape Town City, Galaxy neMagesi FC ngenxa yesizathu esifanayo.