KUBHEKWE ukuthi sivalwe ngomqeqeshi wangaphandle isikhala somqeqeshi uDan ‘Dance’ Malesela, osanda kudedelwa yiMarumo Gallants.
Kuvela ukuthhi leli qembu lisezingxoxweni nomqeqeshi waseMorocco, u-Abdeslam Ouaddou, osethelekile kuleli.
Ligcine ligcwale umoya ibhantshi kuMalesela, nosomaqhinga wakhe, uMolefi Ntseki, kulandela ukugqoza kwemiphumela yeqembu.
Ukukhonjwa indlela kukaMalesela noNtseki kuqinisekiswe yiqembu izolo esitatimendeni esithunyelwe kwabezindaba.
UNtseki, oqeqeshe kwiKaizer Chiefs ngesizini edlule, ukhonjwa indlela kwiGallants nje ubeqashwe yiqembu ekupheleni kukaNovemba.
Okwamanje izintambo zizobanjwa nguSundara Govender, noDuncan Lechesa abebengamaphini kaMalesela.
UMalesela ukhonjwa indlela nje ubeke wasikazwa ngejozi ngabaphathi beqembu njengoba maphakathi noDisemba enikwe “ikhefu eliyisipesheli”, kwabamba uGovender, noLechesa.
Nokho luqhubekile nokubheda uhlelo, okubalwa nokunabiswa kweqembu ngo 8-1 yi-Orlando Pirates koweligi ngawo uDisemba, nokubukeka kuyikho okwenze abaphathi beqembu bambuyisa uMalesela ekupheleni kukaDisemba.
Nakuba iGallants ikwazile ukuqoqa amaphuzu amahlanu emidlalweni emithathu ngoJanuwari ngemuva kokubuya kukaMalesela kodwa ukulahla amaphuzu emidlalweni emithathu yeligi yakamuva, okubalwa nowangoLwesithathu eshaywe kuwo ngo 3-1 yiMamelodi Sundowns, kubukeka kuyikho okumdalele isigcwagcwa lo mqeqeshi kubaphathi.
IGallants ezibekisele indawo kuma-quarterfinal eNedbank Cup lapho iqhathwe khona neDurban City, isahlezi endaweni ka-14 kwi-log yeBetway Premiership ngamaphuzu angu-15 kuphela emidlalweni engu-17 esayidlalile.
Ibuyela ensimini kusasa ngo-3.30 ntambama, ngokubhekana nePolokwane City kowePremiership, eDr Molemela Stadium, eBlomfontein.
UMalesela ubethathe izintambo zokuqeqesha iqembu ngaphambi kokuqala kwesizini, ngemuva kokuba abaphathi beqembu ebeselidlala kwiMotsepe Foundation Championship, bethenge isitifiketi sePremiership kwiMoroka Swallows efakwe endalini ekupheleni kwesizini edlule.
Lo mqeqeshi oneminyaka engu-59 ubudala, oseqeqeshe amaqembu ehlukahlukene, kubukeka limlandela ishobolo lokuxoshwa njalo emaqenjini awaqeqeshayo. Kwayona iGallants imxosha nje, bese kuyihlandla lesithathu imkhomba indlela.
Wayiqeqesha okokuqala ngo-2020/2021 yamxosha, yaphinde yamlanda ngesizini ka-2022/23, yamkhomba indlela futhi. Kwaba ngesifanayo nakwiChippa United nayo eyamxosha yaphinde yamlanda.