Supersport United (0) 0
Mamelodi Sundowns (2) 3
IMamelodi Sundowns iqhubekile nomgqigqo wokunqoba imidlalo yeligi ilandelana ibhaxabula iSupersport United emdlalweni wabakhaya basePitoli weBetway Premiership eLucas Moripe Stadium, e-Atteridgeville, ngoLwesithathu ebusuku.
Amagoli eSundowns ashaywe nguTashreeq Matthews amabili ngesiwombe sokuqala nesesibili, noJayden Adams ngesiwombe sokuqala.
ISundowns inenebula iSupersport nje, ibisinqoba umdlalo wesithupha kulandelana ngaphansi komqeqeshi uMiguel Cardoso othathe izintambo zokuqeqesha kuManqoba Mngqithi okhonjwe indlela ngoDisemba.
ISundowns, okuyiyona esaqhwakele kwi-log yePremiership ngamaphuzu angu-39 emidlalweni engu-14, ivule igebe lamaphuzu ayisithupha phakathi kwayo nezimbangi, i-Orlando Pirates, esendaweni yesibili ngangu-33 emidllaweni engu-13.
Ibhuquzisa iSupersport nje iSundowns, nePirates ayizibekile phansi njengoba ishaye iSekhekhune United ngo 2-1 komunye umdlalo odlalwe ngesikhathi esifanayo e-Old Peter Mokaba Stadium, ePolokwane.
ISundowns okuyiyona ebiphezulu ngomdlalo kuzo zombili iziwombe, ishaye inethi kusaphele imizuzu engu-11 kuphela, u-Adams eshaya egoli lakhe lokuqala edlubhe ijezi lamaSandawana asanda kuwajoyina esuka kwiStellenbosch FC.
Sekusele imizuzwana ziye ekhefini, uMatthews ushayele iSundowns elesibili ngemuva kwebhola eliqhamuke noPeter Shalulile, okwenze zaya ekhefini iSundowns ihamba phambili ngo 2-0.
Zibuya nje ekhefini ngesiwombe sesibili, iSundowns iqhubeke lapho ebigcine khona uMatthews eshaya igoli lakhe lesibili kulo mdlalo elenze kwaba ngu 3-0 ngomzuzu ka-49, ngemuva komnyakazo obuqhamuke noLucas Ribeiro obewuhlupho.
Ukuba sefomini enhle kwamaSandawana neZimnyama ngokufanayo emidlalweni yakamuva, akubuzwa ukuthi kwenyusa isasasa kubalandeli bala maqembu ngokufanele bakulindele njengoba ezotholana phezulu emdlalweni wePremiership obhekwe ngamehlo abomvu ngoMgqibelo ngo-3.30 ntambama, eLoftus Versfeld Stadium, ePitoli.