XOLILE MPISANE
USABHEKE ezinye izimpawu zokuthuthuka eqenjini lakhe umqeqeshi we-University of Western Cape, uThinasonke Mbuli, yize liqale isizini ka-2023 yeHollywoodbets Super League ngokunenebula iCoal City Wizards ngo 9-1 ngempelasonto.
UNtombifikile Ndlovu uhlohle amagoli amathathu, uSibulele Holweni wavalela amabili kwathi uZikhona Nogqala, Philisa Mjambane, Khanya Xesi noKholosa Biyana bashaya igoli ngamunye emdlalweni obusePuma Stadium, eMalahleni.
Ukunqoba ngembudlu yamagoli kubeke i-UWC esicongweni ngemuva komzuliswano wokuqala wemidlalo. alikho elinye iqembu elinqobe ngamagoli amathathu noma ngaphezulu.
Ngesizini edlule leli qembu elizinze eKapa liqede endaweni yesibili kwi-log ngamaphuzu angu-68, lisele ngamaphuzu angu-14 kompetha iMamelodi Sundowns Ladies.
UMbuli uthi kumele bathuthuke emikhakheni eminingi ukuze bazuze okungcono kunalokhu abakuzuze ngesizini edlule.
“Sisaqhuba ngendlela ebesenza ngayo kula masizini ambalwa adlule, inhloso yethu kule sizini wukwenza kangcono kunalokhu esikwenze ngesizini edlule,” kusho lo mqeqeshi, oyiphini kwiBanyana Banyana.
“Besifuna ukuyiqala kahle isizini ngokuqoqa amaphuzu amathathu, sakwenza lokho. Nokho angeneme ngesibalo samathuba esiwamoshile.
“Indaba yokungawasebenzisi amathuba yinto ebivele iyinkinga nakumasizini adlule futhi yinto okumele siqhubeke nokuyilungisa ukuze sithuthuke."
Yize amaqembu amaningi ethengile futhi adayisa inqwaba yabadlali ngaphambi kokuqala kwesizini, uMbuli akenzanga izinguquko eziningi eqenjini lakhe.
I-UWC isayinise umdlali wasesiswini weBanyana Banyana, uKholosa Biyana, obegijima eqenjini laseSpain iSporting Gijon.
Iphinde yakhuphula abadlali abathathu abebegijima eqenjini layo elincane, uThimna Mpehle (19), Ember Edwards (21) noNabeelah Galant (19).
Kweminye imidlalo yeSuper League yangempelasonto, iSundowns Ladies iwathole kunzima amaphuzu emdlalweni wayo wokuqala wesizini idlula kwiRichmond Ladies ngo 1-0 eLucas Moripe Stadium ngeSonto.
Igoli eliweze amaSandawana kulo mdlalo livalelwe nguBoitumelo Rabale ngasekuqaleni kwesiwombe sesibili.
Amaqembu amabili aKwaZulu-Natal athole imiphumela ehlukene emidlalweni yawo yokuvula. IDurban Ladies iguqiswe yi-University of Johannesburg ngo 2-0 ekhaya, kwathi iRoyal AM yahlula iMa-Indies ngo 2-0 eGiyani.
Amaqembu angomakoti kule ligi aqhamuka kwiSasol League, iCopperbelt ne-University of Pretoria, aqhathwe zibekwa esigabeni esiphezulu.
I-Copperbelt iqoqe amaphuzu ayo okuqala kwiSuper League ngokushaya AmaTuks ngo 2-1.
Imiphumela yeHollywoodbets Super League: Coal City Wizards 1-9 University of Western Cape, City Lads 1-0 TS Galaxy Queens, Ma-Indies Ladies 0-2 Royal AM, Durban Ladies 0-2 University of Johannesburg, Copperbelt 2-1 University of Pretoria, JVW FC 1-1 Thunderbirds, Mamelodi Sundowns Ladies 1-0 Richmond Ladies, First Touch 0-0 Tshwane University of Technology.