Akuzange kumthene amandla ukaputeni we-TS Galaxy, uMlungisi Mbunjana, ukukhishwa eqenjini lesizwe elizodlala kwi-African Cup of Nations (Afcon) eqala ngoMgqibelo, e-Ivory Coast.
Lo mdlali wasesiswini ubengomunye wabadlali abangu-50 okuhlungwe kubona abadlali abazomela izwe lalapha kwi-Afcon.
Umqeqeshi weBafana Bafana, uHugo Broos, uqome ukulishiya ngaphandle esememezela elokugcina labawu-23 eliqhathwe neMali, Tunisia neNamibia kwiGroup E.
Umdlalo wokuqala iBafana izowudlala neMali, ngoLwesibili, ngo-10 ebusuku.
UMbunjana ongelinye lamasosha omqeqeshi uSead Ramovic kwiThe Rockets, usedlale ewu-14 ye-DStv Premiership nemithathu yeCarling Black Label Knockout abafike kuyo kowamanqamu.
Sekuyindaba endala ukuthi bagcine beshaywe yiStellenbosch. UMbunjana uthe akuzange kumphathe kabi ukushiywa ngaphandle eqenjini eliya e-Ivory Coast.
Kunalokho kumnike amandla okubuyela emuva ayojima ngamandla aphinde aqhubeke nokuhola ngobuqotho iqembu lakhe.
"Kunezinto empilweni ongeke ukwazi ukuzilawula. Ukubizelwa eqenjini lesizwe ngenye yalezo zinto. Engingaba namandla okukulawula yindlela engijima ngayo, engidlala ngayo nengizilungisela ngayo," kubeka uMbunjana obedlala kwiHighlands Park ngaphambi kokujoyina leli qembu likaTim Sukazi.
Lo mdlali usebizelwe amahlandla ayisithupha kwiBafana.
Udlale emibili kuphela kubhekenwe neNamibia neDemocratic Republic of Congo (DRC) kweyobungani.
Esiswini uBroos uqome ukuhamba noTeboho Mokoena, Sphelelo Sithole, Jayden Adams, Thabang Monare, Thapelo Maseko noThapelo Morena.
"Ngaso sonke isikhathi ngibeka phambili iqembu lami. Angilenzi iphutha lokuzidlalela mina ukuze ngizobonwa wumqeqeshi weqembu lesizwe.
Ngiyababongela abadlali abagcine bekhethiwe. Bonke bangabezinga eliphezulu. Kimina kuyinto enkulu ukubizelwa eqenjini lesikhashana. Ngicabanga ukuthi umqeqeshi ubengibize ngoba kukhona okuhle akubonile.
Ngizoqhubeka nokusebenza kanzima. Konke kuzoncika kuNkulunkulu," kubeka uMbunjana.
IGalaxy ivale unyaka isendaweni yesishiyagalombili, ngamaphuzu awu-21, emidlalweni ewu-15. Emidlalweni emibili yokugcina ishaye iChippa United neLamontville Golden Arrows.