UMDLALI weKaizer Chiefs, uGlody Lilepo ecela indlela ku-Omega Mdaka weStellenbosch FC emdlalweni weBetway Premiership eFNB Stadium, eNasrec, ngoLwesibili ebusuku
Image: Isithombe:BACKPAGEPIX
IKAIZER Chiefs iphunyukwe yithuba lokubhekana ne-Orlando Pirates ishayela phezulu ngokwehlulwa yiStellenbosch FC emdlalweni weBetway Premiership eFNB Stadium, eNasrec, ngoLwesibili ebusuku.
IChiefs ihambe phambili ngegoli likaFlavio da Silva esiwombeni sokuqala emdlalweni obekubukeka izowunqoba ngendlela ebigeleza ngayo. Nokho bakucishe konke lokho uLangelihle Phili noDevin Titus beshayela iStellies amagoli esiwombeni sesibili.
Ngaphandle kokuthi iChiefs iphunyukwe yithuba lokwenyukela endaweni yesithathu kwi-log yePremiership, ukuwina bekuzoyenza ibhekane nePirates emdlalweni wabakhaya eFNB Stadium ngoMgqibelo inomfutho. IPirates isazikhotha amanxeba kulandela ukukhala ngaphansi kwiCasric Stars emdlalweni we-Last 16 yeNedbank Cup ngempelasonto edlule. Lokhu kusho ukuthi inengcindezi yokwehlula iChiefs ukuze izobuyisa ithemba kubalandeli kwazise isishaywe emidlalweni emibili ilandelana.
Ngemuva kowehlulwa yiStellies, umqeqeshi weChiefs uKhalil Ben Youssef, uthe bekufanele baqede ngeStellies esiwombeni sokuqala.
"Uma uwuphethe umdlalo esiwombeni sokuqala, kufanele uqede. Uma ungakwenzi lokho kwenzeka lokhu okwenzeke kwesesibili. Ngicabanga ukuthi kufanele siwavume amaphutha kwesinye isikhathi. Kufanele sixolile kubalandeli. Sinezinsuku ezintathu ukucabanga ngomdlalo olandelayo. Uma uthola amathuba ayisikhombisa uwashweba wonke, ngisho kungekho muntu epalini uhlulwa wukushaya igoli, sizokwenzani emuva kwalokho?," kusho uBen Youssef oqeqesha ngokubambisana noCedric Kaze.
Laba baqeqeshi bazohlala ebhentshini kowabakhaya okokuqala engasekho uNasreddine Nabi abebengamaphini akhe. Ngesikhathi iChiefs igcina ukubhekana nePirates emdlalweni wamanqamu weNedbank Cup ngoMeyi, inqobe ngo 2-1.